ᑖᒃᑯᐊ ᑐᓐᖓᕕᓖᑦ ᑕᖅᖁᑎᒃ ᐃᑯᒪᓕᐅᕐᓂᒧᑦ (ᑕᖅᖁᑎ), ᑭᒡᒐᑐᕐᑕᐅᓱᑎᒃ ᑖᒃᑯᓄᖓ ᑲᔪᓯᒃᑫᔨᒥᓐᓄᑦ, ᑲᑎᓚᐅᕐᑐᑦ ᒫᑦᓯ 24ᒍᑎᓪᓗᒍ ᑰᑦᔪᐊᒥ ᑲᑎᒪᐅᑎᖃᕐᓱᑎᒃ ᐱᒋᐊᕐᑎᓯᓂᕐᒧᑦ ᐋᖅᕿᓯᒪᐅᑎᑦᓴᒥᒃ ᐊᒻᒪᓗ ᑲᔪᓯᓕᕇᕐᑐᓄᑦ ᐊᒻᒪᓗ ᓯᕗᓂᕐᒥ ᐱᔭᑦᓴᐅᓂᐊᕐᑐᓂᒃ ᑕᒪᑐᒪᓂ ᓄᑖᒥ ᐱᔭᑦᓴᒥ.  ᑖᑦᓱᒪᐅᑉ ᑭᒡᒐᑑᑎᖓ ᑲᔪᓯᑎᑦᓯᓂᐊᕐᓗᓂ ᓄᑕᐅᓪᓕᑐᕐᕕᓕᒻᒥᒃ ᐃᑯᒪᓕᐅᕐᓂᒥᒃ ᐱᓇᓱᐊᕐᓗᓂ ᐊᒻᒪᓗ ᐃᓚᐅᕕᖃᕐᓗᓂ ᓄᓇᕕᒻᒥᐅᑦ ᐊᔪᐃᓐᓈᖓᓄᑦ ᐃᑯᓪᓚᑎᑦᓯᒋᐊᕐᓂᒥᒃ ᐳᔪᕐᓗᓕᐊᓂᒃ ᓄᓇᕕᒻᒥ.  ᑕᒪᓐᓇ ᖃᐅᔨᓚᐅᕐᓯᒪᓇᓐᖏᑐᖅ ᐊᐅᓚᑦᔭᕆᐊᕈᑕᐅᔪᖅ ᓄᐃᓚᕿᔭᐅᕗᖅ ᑲᑐᑦᔮᕆᔭᐅᑦᓱᓂ ᑖᒃᑯᓅᖓ ᑕᕐᕋᒥ ᒪᕐᕉᓄᑦ ᐃᓄᒡᒍᑎᒃᓴᓕᐅᕐᓂᒧᑦ ᐱᕙᓪᓕᐊᑎᑦᓯᓂᕐᒥᒃ ᑎᒥᒻᒪᕇᓐᓄᑦ, ᐃᓚᒌᓴᕐᒧᑦ ᐊᒻᒪᓗ ᒪᑭᕝᕕᒃ ᑯᐊᐳᕇᓴᒧᑦ.

ᒪᑭᕝᕕᒃ ᑯᐊᐳᕇᓴ ᐊᒻᒪᓗ ᐃᓚᒌᓴᖅ ᐱᓇᓱᐊᖃᑎᒌᒍᑎᖃᕐᓱᑎᒃ ᐱᒍᓐᓇᓯᐊᕐᕕᒥᒍᑦ ᐊᒻᒪᓗ ᐱᑦᓴᑖᕕᒋᒍᓐᓇᑕᕐᒥᒍᑦ ᐱᕙᓪᓕᐊᕈᑎᒃᓴᖓᓄᑦ ᑕᒪᑐᒪᐅᑉ ᐃᑯᒪᓕᐅᕐᓂᒥᒃ ᐊᐅᓚᑦᔭᕆᐊᕈᑎᖃᕐᓂᐅᑉ.  ᑖᒃᑯᐊ ᑲᒪᒋᐊᕈᓯᖓᑦ ᓄᓇᓕᑎᒍᑦ ᐱᓇᓱᐊᕐᓂᓂᒃ ᐊᐅᓚᑕᖓᓂᐅᒃ ᑕᖅᖁᑎᐅᑉ ᑕᒐ ᐱᕙᓪᓕᐊᑎᑕᐅᖁᓗᒋᑦ, ᐊᑐᓕᕐᑎᑕᐅᑎᓪᓗᒋᑦ ᐊᒻᒪᓗ ᐊᐅᓚᑕᐅᓗᑎᒃ ᑕᒪᒃᑯᑎᒎᓇ ᑐᓐᖓᕕᖃᑦᓯᐊᑐᒃᑯᑦ ᐊᒻᒪᓗ ᒥᑦᓯᖃᑦᓯᑐᒃᑯᑦ ᑮᓇᐅᔭᓕᐅᕋᓱᐊᕐᓂᑎᒍᑦ ᑲᑐᑦᔨᓗᑎᒃ ᐃᓚᖃᕐᓗᑎᒃ ᓄᓇᓕᑎᒍᑦ ᐱᓇᓱᒃᕕᓂᒃ ᑕᒪᑐᒥᖓᓕᕆᔪᓂᒃ, ᓱᒐᓗᑦᑐᒥᒃ ᓄᓇᒥᒃ ᑎᒍᒥᐊᕐᑎᑯᑦ ᐊᒻᒪᓗ ᓄᓇᓕᒻᒥ ᑯᐊᐸᒃᑯᑦ.  ᓯᕗᓪᓕᐅᑎᓪᓗᒍ ᑐᕌᕐᑕᐅᒍᒪᔪᖅ ᒪᓐᓇ ᖁᓚᕐᓇᖏᑦᑐᑯᑦ ᐃᒫᒃ ᐊᑎᔭᐅᕙᓪᓕᐊᓂᖓ ᐅᕐᓱᐊᓗᑦᑐᓂᕐᒥᑦ ᓄᑕᐅᓪᓕᑐᕈᓐᓇᑐᓄᑦ ᐃᑯᒪᓕᐅᕐᓂᖅ ᐱᓇᓱᐊᒐᑦᓴᐅᖏᓐᓇᒪᑦ ᐃᓗᐃᑦᑐᒥᒃ ᐊᐅᓚᑕᐅᑦᓱᓂ ᐊᒻᒪᓗ ᐃᖏᕐᕋᑎᑕᐅᑦᓱᓂ ᑲᑐᑦᔮᕆᑦᓱᒍ ᓄᓇᕕᒻᒥ ᓇᒻᒥᓂᐅᑦᓱᑎᒃ ᐱᓇᓱᐊᕐᕕᓄᑦ ᐊᒻᒪᓗ ᐊᖏᔫᑎᒍᓐᓇᕕᖓᒍᑦ ᐅᑎᕐᕕᐅᖃᑦᑕᓗᑎᒃ ᐊᒻᒪᓗ ᐱᕙᓪᓕᖁᑎᖏᑦ ᐱᓗᑎᒃ ᓄᓇᓕᓐᓄᑦ.

ᓯᕗᓪᓕᐅᓱᓂ ᑕᖅᖁᑎᐅᑉ ᐱᓇᓱᐊᕐᓂᖓᑕ ᐊᑐᓕᕐᑎᑕᖓ ᑕᒡᕙᓂ ᐅᑭᐅᒥ ᑌᒃᑰᕗᑦ ᐅᓕᕐᓀᓯᓂᖅ ᐊᒻᒪᓗ ᖃᐅᔨᓴᐅᑎᖃᕐᓂᖅ.  ᓯᓚᓐᓂᐅᑏᑦ ᓇᐸᕈᑌᑦ ᓇᑉᐹᑎᕐᑕᐅᓂᐊᕐᓱᑎᒃ ᑖᒃᑯᓇᓂ ᑕᓪᓕᒣᓂ ᓄᓇᓂ ᓄᓇᕕᒻᒥ ᑲᑎᕐᓱᐃᒍᑕᐅᓂᐊᕋᒥᒃ ᐱᕙᓪᓕᐊᒍᑎᑦᓴᓂᒃ ᓄᑕᐅᓪᓕᑐᕐᕕᖃᕐᓱᑎᒃ ᐃᑯᒪᓕᐅᕐᓂᒥᒃ.  ᑌᑰᓇᓗᑦᑕᐅᖅ ᓱᓕ, ᑲᒻᐸᓂᖅ ᑲᑐᑦᔨᖃᑎᖃᕐᒥᓗᓂ ᖃᐅᔨᓴᕐᓂᒥᒃ ᐱᓕᕆᕕᐅᓲᓂᒃ, ᐃᓚᐅᒻᒥᑎᓪᓗᒋᑦ Nergica, Hydro Quebec ᐊᒻᒪᓗ ᐊᓯᒋᒻᒥᔭᖏᑦ ᖃᐅᔨᓴᖁᓗᒋᑦ ᐊᓱᐃᓛᒃ ᐱᒍᓐᓇᓂᐊᕋᓗᐊᕐᒪᖔᑦ ᑕᒪᒃᑯᐊ ᐃᓚᓗᐊᓐᖑᐊᖏᑦ ᖃᕆᑕᐅᔭᕈᑎᑎᒎᕐᑐᑦ, ᐱᖃᓯᐅᑦᔨᒥᓗᒋᑦ ᐊᓄᕆᒧᑦ ᐊᒻᒪᓗ ᓯᕿᓂᕐᒧᑦ ᐆᒻᒪᖁᑎᓕᐅᕐᓂᖅ.

 

ᐱᐅᑦᑐᐊᕈᓐᓇᑐᒥᒃ ᐱᕙᓪᓕᐊᓂᖅ ᓄᓇᕕᒻᒥ ᐃᓕᖓᔪᒥᒃ ᑐᕌᓱᓂᓗ ᓄᓇᕕᒻᒥᐅᓄᑦ

ᑕᒐᑕᒐᐅᑎᓪᓗᒍ, ᑕᒪᖏᑦ ᐃᑯᒪᐅᑎᖃᕐᓃᑦ ᓄᓇᕕᒻᒥ ᐃᖏᕐᕋᑎᑕᐅᒻᒪᑕ ᐅᕐᓱᐊᓗᑦᑐᑐᓂᒃ ᐊᐅᓚᐅᑎᐊᓗᓐᓄᑦ, ᑕᒐᓘᑯᐊ ᑯᐯᒃ ᑲᕙᒪᖓᑕ ᐃᑯᒪᖃᕐᓂᒧᑦ ᒪᓕᒐᖓ 2030 ᐋᖅᖀᓯᒪᔪᑦ ᑐᕌᕐᓱᒍ ᐃᑯᓪᓚᑎᑦᓯᒋᐊᕐᓂᒥᒃ ᐅᕐᓱᐊᓗᑦᑐᓂᕐᒥᒃ 40% ᒧᑦ ᐅᑭᐅᒍᓂᐊᕐᑐᑦ ᑕᓪᓕᒪᐅᔪᕐᑐᑦ ᒥᑦᓯᑎᒍᑦ.  “ᑲᓇᑕᐅᑉ ᐅᑭᐅᕐᑕᑐᖓ ᓱᒐᓗᑦᑐᒥᒃ ᓱᕐᕋᑕᐅᒋᐊᑭᑦᑐᐊᐱᐅᒻᒪ ᓯᓚᐅᑉ ᐊᓯᑦᔨᐸᓪᓕᐊᓂᖓᓄᑦ, ᐱᕙᓪᓕᐊᔭᐅᔪᓂᖓ ᐃᑯᒪᓕᐅᕐᓂᐅᑉ ᓄᓇᑦᑎᓂ ᐱᓪᓚᕆᐅᑦᓱᓂ ᐊᓪᓗᕆᐊᕐᓂᐅᔪᖅ ᓯᕗᒧᑦ ᓯᓚ ᐱᓪᓗᒍ ᓄᓇᑦᑎᓂ.  ᑕᖅᖁᑎ ᓄᐃᑕᐅᓯᒪᔪᖅ ᑲᒪᒋᔭᐅᖁᑦᓱᒍ ᑕᒪᓐᓇ ᑐᕌᕐᓗᓂᓗ ᐃᓄᓐᓄᐊᖓᓗᓂᓗ.  ᓄᓇᓕᑎᒍᑦ ᑕᕐᕋᒥᓗ ᑎᒥᒻᒪᕇᑦ, ᐊᑕᐅᓯᐅᖃᑎᒌᑦᑐᑦ ᐱᓇᓱᐊᖃᑎᒌᑦᓱᑎᓪᓗ, ᑕᒐᑕᒐ ᓯᕗᒧᑦ ᐃᖏᕐᕋᓕᕐᑐᒍᑦ” ᐅᖃᕐᑐᕕᓂᖅ ᐱᑕ ᐋᑕᒥ, ᐊᖓᔪᖅᖄᒪᕆᖓ ᒪᑭᕝᕕᒃ ᑯᐊᐳᕇᓴᐅᑉ,

ᑕᖅᖁᑎᐅᑉ ᑐᕌᕐᑕᖓ ᑕᒐ ᖁᓚᕐᓇᖏᑦᑐᑯᑦ ᐃᒫᒃ ᐱᓇᓱᐊᕐᑕᐅᔪᑦ ᐊᕙᑎᒧᑦ ᐅᓗᕆᐊᓇᕐᑑᒍᓐᓀᓗᑎᒃ ᐊᒻᒪᓗ ᐋᖅᕿᒋᐊᕐᓯᒪᓗᑎᒃ ᐃᓱᐊᕐᓂᖓᒍᑦ ᑭᓐᖒᒪᔭᖓᓂᒃ ᐊᑐᓂᑦ ᓄᓇᓕᐅᑉ, ᑕᒐᓗ ᓯᕗᒧᐊᑦᑎᓯᓗᓂ ᐱᓇᓱᐊᒐᑦᓴᓂᒃ ᓄᐃᑎᕆᓂᕐᒥᒃ ᓄᓇᓕᑎᒍᑦ ᐊᒻᒪᓗ ᑕᕐᕋᒥ.  ᑌᒣᒻᒪᑦ, ᒥᑦᓯᓕᒃ ᐊᒻᒪᓗ ᑐᓐᖓᕕᓕᕐᓯᒪᑦᓯᐊᑐᖅ ᑲᑐᑦᔨᓂᖅ ᐱᓇᓱᐊᖃᑎᒌᓐᓂᑯᑦ ᓄᓇᕕᒻᒥ ᓄᓇᒥᒃ ᑎᒍᒥᐊᕐᑎᑯᖏᓐᓂᒃ ᐊᒻᒪᓗ ᑯᐊᐸᓂᒃ ᑕᖏᕆᕙᐅᒃ ᑕᒪᑐᒪᐅᑉ ᑮᓇᐅᔭᓕᐅᕋᓱᐊᕐᓂᒧᑦ ᓴᓇᒻᒪᖓᑕ ᑕᒪᑐᒪ ᐱᕙᓪᓕᐊᔭᐅᓂᖓᑕ, ᓇᒻᒥᓂᖃᕐᓂᖅ ᐊᒻᒪᓗ ᐃᖏᕐᕋᑎᒃᓯᓂᖅ ᑕᒪᒃᑯᓂᖓ ᐱᓇᓱᐊᕐᑕᐅᔪᓂᒃ.  “ᐃᑯᒪᓕᐅᕐᓂᐅᑉ ᐊᓯᑦᔨᓂᖓ ᐱᓪᓚᕆᐅᑦᓱᓂ ᐱᕙᓪᓕᐊᓂᐅᕗᖅ ᐱᕕᑦᓴᓯᐊᖅ.  ᐱᒍᒪᔭᕗᑦ ᑭᓇᓕᒫᒃᑯᓂᒃ ᓱᖅᖁᐃᑐᒥᒃ ᐃᒫᒃ ᓄᓇᓖᑦ ᓱᕐᕋᑕᐅᖁᑦᓱᒋᑦ ᓴᑑᒪᓇᕐᑑᑎᓪᓗᒍ ᐊᒻᒪᓗ ᐱᕙᓪᓕᖁᑎᖃᕐᓗᑎᒃ ᑕᒪᑐᒥᖓ, ᕿᒪᒐᐅᑎᒍᓐᓀᓗᑎᒃ,” ᐅᖃᕐᐳᖅ ᒥᐊᔨ ᔪᐊᓇᓯ, ᐊᖓᔪᖅᖄᖓ ᐃᓚᒌᓴᐅᑉ.

ᑕᒪᓐᓇ ᑌᒣᑦᑐᓕᕆᒋᐊᕐᓂᖅ ᑐᕌᕆᐊᕐᒥᓱᓂ ᐱᒍᓐᓇᓯᑎᑦᓯᓂᕐᒥᒃ ᓄᓇᕕᒻᒥᐅᓂᒃ ᓇᔪᕐᑕᒥᓂᒃ ᖃᐅᑉᐸᐅᓂᐊᕐᑐᒧᑦ ᐃᑯᒪᓕᐅᕈᓐᓇᓗᑎᒃ ᓴᓇᓂᒃᑯᑦ ᖃᐅᔨᒪᐅᓯᕐᒥᒃ ᖃᐅᔨᒻᒫᕆᓕᕐᓗᒍ ᐊᒻᒪᓗ ᐱᕙᓪᓕᐊᒍᓐᓇᓂᕐᒥᒃ ᐃᓄᐃᑦ ᐱᓯᑎᐅᕕᒋᓗᒍ ᑌᒣᑦᑐᓕᕆᐅᓯᖅ ᓄᑕᐅᓪᓕᑐᕈᓐᓇᑐᒥᒃ ᐃᑯᒪᐅᑎᓕᐅᕐᓂᖅ.

 

ᐃᓚᒌᓴᖅ ᐱᓪᓗᒍ –

ᓇᑉᐸᑕᐅᔪᕕᓂᖅ ᐊᒻᒪᓗ ᐊᐅᓚᑕᐅᓪᓚᒥ ᓄᓇᕕᒻᒥᐅᓄᑦ, ᓄᓇᕕᐅᑉ ᑕᓪᓕᒪᐅᔪᕐᑐᓗ ᓯᑕᒪᓪᓗ ᑯᐊᐸᖏᑦ ᐊᑐᐃᓐᓇᓯᕕᐅᔪᑦ ᐊᒥᓱᐃᓂᒃ ᐱᒍᑦᔭᐅᓂᕐᓂᒃ ᐃᓕᖓᔪᓂᒃ ᓄᓇᓕᒻᒧᑦ: ᓂᐅᕕᕐᕕᒥᒃ, ᓯᓂᒃᑕᕕᒻᒥᒃ, ᐱᑐᑦᓯᒪᐅᑎᓂᒃ ᑕᑯᓐᓇᕈᑎᓄᑦ, ᐅᕐᓱᐊᓗᑦᑖᕕᓐᓂᒃ, ᐅᕐᓱᐊᓗᒻᒥᒃ ᒥᓇᕋᕐᓂᓂᒃ, ᐊᓯᖏᓐᓂᓗ.

ᓇᑉᐸᑕᕕᓂᖅ 1967ᒥ ᐃᑲᔪᕐᑐᓴᐅᓂᐊᕐᓱᓂ ᓄᓇᕕᒻᒥ ᑯᐊᐸᓐᓂᒥᒃ ᐃᓱᐊᕐᓂᖓᒍᑦ ᖁᓚᕐᓇᖏᑦᑐᑯᑦ ᐱᕈᑦᓯᐊᖁᓗᒍ, ᐃᓚᒌᓴᖅ ᐃᑲᔪᕐᑐᖅ ᐃᓚᒌᓴᕐᑐᓂᒃ ᑯᐊᐸᓂᒃ ᒪᑯᑎᒎᓇ: ᓂᐅᕕᐊᑦᓴᑖᕐᓂᑯᑦ, ᐃᓕᓐᓂᐊᑎᑦᓯᖃᑦᑕᓂᒃᑯᑦ, ᓯᖁᒥᓯᒪᔪᕐᓂᐊᑎᖃᕐᓂᑯᑦ, ᐱᓇᓲᑎᓕᕆᓂᕐᓂᒃ ᐊᒻᒪᓗ ᐊᐅᓚᑦᓯᔨᓄᑦ ᐃᑲᔪᕐᑕᐅᕕᓕᒃ.  ᐱᓇᓱᐊᖃᑕᐅᒻᒥᓱᓂᓗ ᐊᑦᔨᒌᓐᖏᑐᑎᒍᑦ ᐃᓄᒡᒍᑎᑦᓴᓕᐅᕐᓂᒧᑦ ᐃᓕᖓᔪᓂᒃ ᑕᒐ ᓂᐅᕐᕈᓯᕐᓂᕐᒥᒃ ᐃᓄᓕᕐᑕᓂᒃ ᑕᑯᒥᓇᕐᑐᓕᐊᒍᓯᒪᔪᓂᒃ, ᐃᑯᒪᓕᐅᕐᓂᒥᒃ ᐊᒻᒪᓗ ᐅᓯᑲᑦᑕᑎᖃᕐᓂᒥᒃ.

ᐃᓚᒌᓴᐅᑉ ᑎᒥᐊᕈᖁᑎᒋᒻᒥᔭᖏᑦ ᐅᑯᐊᒍᒋᕗᑦ ᓄᓇᕕᒻᒥ ᐅᕐᓱᐊᓗᓕᕆᓂᖅ ᑎᒥᓐᖑᑎᓯᒪᔪᖅ, ᐅᕐᓱᐊᓗᓐᓂᐊᓂᖅ ᓯᕙᕕᐊᓪᒥ ᑎᒥᓐᖑᑎᓯᒪᔪᖅ, ᐃᓚᒌᓴᐅᑉ ᓴᓇᔨᖁᑎᖃᕐᓂᖓ ᑎᒥᓐᖑᑎᓯᒪᔪᖅ, ᑕᕐᕋᒧᑦ ᐅᓯᔩᑦ ᑎᒥᓐᖑᑎᓯᒪᔪᖅ, ᐅᓯᑲᑦᑕᑏᑦ ᑲᑎᓐᓂᖅ ᑎᒥᓐᖑᑎᓯᒪᔪᖅ, ᐅᓯᑲᑦᑕᑏᑦ ᐹᑦᓚᔮᑦ ᑎᒥᓐᖑᑎᓯᒪᔪᖅ, ᐃᓚᒌᓴᐅᑉ ᐊᕐᕕᑕᐅᑎᓕᕆᕕᖓ ᑎᒥᓐᖑᑎᓯᒪᔪᖅ, ᐱᖁᑎᕗᑦ ᐊᑦᑕᑐᒉᑦ ᑎᒥᓐᖑᑎᓯᒪᔪᖅ, ᑕᖅᖁᑎ ᐃᑯᒪᐅᑎᓕᐅᕐᓂᖅ ᑎᒥᓐᖑᑎᓯᒪᔪᖅ ᐊᒻᒪᓗ ᐱᓇᓱᐊᖃᑎᖃᕐᒥᓱᓂ ᐅᕐᓱᐊᓗᓕᕆᓂᕐᒥᒃ ᓇᓯᑭᓄᒃ LP ᒥᒃ, ᑖᓐᓇᓕ ᓯᕙᕕᐊᓪ ᓄᓇᖓᓃᑦᑐᖅ.

ᑕᑯᒋᐊᕈᒪᔪᖃᕈᓂ ᑯᐊᐸᓐᓂᒥᒃ ᓄᓇᕕᒻᒥ ᑕᒐ: https://www.facebook.com/455534244475061/videos/2618838078382271/
ᐅᐸᑦᑕᐅᒍᓐᓇᕆᕗᒍᑦ ᐅᕙᓂ www.fcnq.ca

ᒪᑭᕝᕕᒃ ᑯᐊᐸᕇᓴ ᐱᓪᓗᒍ–

ᒪᑭᕝᕕᒃ ᑯᐊᐳᕇᓴ ᓄᓇᒥᒃ ᐊᖏᖃᑎᒌᓐᓂᒧᑦ ᑎᒥᒻᒪᕆᐅᕗᖅ ᑲᒪᒋᔭᑦᓴᖃᕐᑎᑕᐅᑦᓱᓂ ᐊᐅᓚᓗᒋᑦ ᕿᒻᒪᖁᑎᓄᑦ ᑮᓇᐅᔦᑦ ᐱᔭᐅᔪᑦ ᐃᓄᖏᓐᓄᑦ ᓄᓇᕕᐅᑉ ᔦᒥᓯ ᐯ ᐊᒻᒪᓗ ᑯᐯᒃ ᑕᕐᕋᖓᑕ ᐊᖏᖃᑎᒌᒍᑎᖓᑕ ᐃᓗᐊᒍᑦ, ᒪᑭᕝᕕᐅᑉ ᐱᔭᑦᓴᕆᒋᕙᐅᒃ ᑲᒪᓗᓂ ᐊᒻᒪᓗ ᕿᑐᕐᖏᐅᑎᓪᓗᒋᑦ ᑕᒪᒃᑯᐊ ᑮᓇᐅᔦᑦ ᐊᒻᒪᓗ ᐱᕙᓪᓕᐊᑎᑦᓯᓗᓂ ᐃᓄᒡᒍᑎᑦᓴᓕᐅᕐᓂᒧᑦ ᐱᕈᕐᐸᓕᐊᓂᕐᒥᒃ ᐃᑲᔪᕐᓂᑯᑦ ᓄᐃᑎᕆᒋᐊᒥᒃ ᑮᓇᐅᔭᓕᐅᕋᓱᐊᕈᑎᑦᓴᓂᒃ ᓇᒻᒥᓂᖅ ᐊᐅᓚᑕᖏᓐᓂᒃ ᐃᓄᐃᑦ ᓄᓇᕕᒻᒥᐅᑦ.  ᒪᑭᕝᕕᒃ ᑯᐊᐳᕇᓴ ᓯᕗᒧᐊᑦᑎᓯᔨᐅᔪᖅ ᐅᖑᒪᔭᐅᒋᐊᖃᕐᓂᖓᓂᒃ ᐃᓄᐃᑦ ᐱᐅᓯᖓᑕ ᐊᒻᒪᓗ ᐃᓄᒃᑐᑦ ᐅᖃᐅᓯᕐᒥᒃ ᓱᓕᓗ ᓱᕐᕃᑑᒋᐊᖃᕐᓂᒥᒃ, ᖃᓄᐃᓐᖏᓯᐊᕈᑎᑦᓴᓂᒃ, ᐊᑦᓱᔫᓂᕐᒥᒃ ᐃᑯᓪᓚᑎᑦᓯᓂᕐᒥᒃ ᐊᒻᒪᓗ ᐃᓕᓴᕐᓂᖓᓐᓂᒃ ᐃᓄᐃᑦ ᓄᓇᓕᓐᓂ.

ᒪᑭᕝᕕᐅᑉ ᑎᒥᐊᕈᖁᑎᖏᑦ ᒪᑯᐊᒍᒋᕗᑦ ᐃᓄᐃᑦ ᖃᖓᑦᑕᔫᖏᑦ, Canadian Northᑯᑦ, ᑲᐅᑕᖅ ᓴᓇᔨᖁᑎᖏᑦ, ᓄᓇᕕᒻᒥ ᓄᓇᖕᖑᐊᓕᕆᕕᒃ, ᓄᓇᕕᒻᒥ ᕿᑐᒻᒪᓭᕕᒃ, ᖃᓪᓗᑎᒃ, N.E.A.S., ᐅᓈᖅ ᐃᒪᕐᐱᒥᓕᔪᑦ ᐊᒻᒪᓗ ᑕᖅᖁᑎ ᐃᑯᒪᓕᐅᕐᓂᖅ.

 

- 30 -

 

ᖃᐅᔨᒋᐊᕐᕕᓭᑦ :