“ᑕᒐᐅᓕᕆᕗᖅ, ᐱᓇᓱᐊᕐᓂᕗᑦ ᓄᐃᑦᓯᓱᑎᒃ ᖄᖏᕐᓂᑯᓂᒃ ᐱᕙᓪᓕᖁᑎᑦᓴᐅᓂᐊᕐᑐᓂᒃ ᐃᓚᐅᔪᓄᑦ ᑯᐊᐸᑦᑎᓂ ᓇᓕᑭᓪᓕᑎᐅᑎᓄᑦ ᐋᖅᕿᒋᐊᕆᐊᑦᓯᐊᕈᑎᖏᓪᓗ ᐱᒍᑦᕕᒍᑎᑦᑕ” ᖁᕕᐊᒋᑦᓱᒋᑦ ᐅᖄᒻᒪᑦ ᒥᐊᔨ ᔪᐊᓇᓯ, ᐊᖓᔪᖅᖄᒪᕆᖓ ᐃᓚᒌᓴᐅᑉ.  ᑐᓴᕐᑎᓯᐅᑏᑦ ᐃᓚᒌᓴᐅᑉ ᐱᓇᓱᐊᕐᕕᖏᑦᑕ ᐱᒍᑦᔨᔪᑦ ᑯᐊᐸᓄᑦ ᐃᓚᒌᓴᕐᑐᓄᑦ ᑎᒥᐊᕈᖁᑎᖏᓪᓗ ᓄᐃᑦᓯᓱᑎᒃ ᑲᔪᓯᔪᒥᒃ ᐊᖏᓕᕙᓪᓕᐊᓂᖓᓂᒃ 2019ᒥ.  ᑕᒡᕙᓂ ᑲᑎᒪᓂᒻᒪᕆᒻᒥ ᐃᓘᓐᓇᑎᒃ ᐊᖏᕐᑐᐃᓇᐅᑦᓱᑎᒃ ᐅᑎᕐᕕᐅᒍᑎᐅᓂᐊᕐᑐᓂᒃ ᐅᓄᕐᓂᓕᓐᓂᒃ $10.5M ᒥᓕᐅᓂᒃ ᑯᐊᐸᓄᑦ ᐃᓚᒌᓴᕐᑐᓄᑦ.

ᑖᒃᑯᐊᓕ ᓇᓕᑭᓪᓕᑎᐅᑏᑦ ᑐᓂᔭᐅᖃᑦᑕᓲᒍᒐᓗᐊᕐᓱᑎᒃ ᐊᕐᕌᒍᖅ ᐱᒋᐊᕋᑖᕐᓂᖓᓂᐅᓂᕐᓴᑯᑦ, COVID-19 ᒧᑦ ᐅᓚᐱᑕᐅᓯᒪᒻᒪᑦ ᐃᓚᒌᓴᐅᑉ ᑐᑭᒧᐊᒍᑎᒋᓲᖓ.  ᒐᓗᐊᕐᑎᓗᒍ, ᑭᖑᕙᕐᓂᑕᖃᕋᓗᐊᕐᑐᖅ, ᑲᑎᒪᓂᒻᒪᕆᖃᕈᓐᓇᓚᐅᖅᖁᖅ ᑲᑎᑦᓱᑎᒃ ᒪᓕᑦᓱᒋᑦ ᐃᓄᓕᒫᓄᐊᖓᔪᓄᑦ ᖃᓄᐃᓐᖏᓯᐊᕆᐊᖃᕐᓂᒧᑦ ᒪᓕᒐᖏᑦ.  ᑖᒃᑯᓇᓂᐊᑫᓐᓇᑐᖅ ᑕᖅᕿᓂ ᖄᖏᕐᑐᓂ ᖃᒻᒥᖅ, ᑯᐊᐯᓪᓗ ᐃᓚᒌᓴᖓᓪᓗ ᐊᐅᓚᑦᔭᕆᐊᕈᑎᖃᓚᐅᕐᒪᑕ ᓱᖅᖁᐃᑐᒃᑯᑦ ᑲᑉᐲᑯᑕᑎᒍᑦ ᓄᓇᕕᒻᒥᐅᑦ ᐱᑦᓱᒋᑦ ᐊᑎᒋᐊᑲᐱᑦᓱᒋᑦ ᓄᑖᒍᓕᕐᑐᑦ ᖃᓄᐃᓐᖏᓯᐊᕈᑎᑦᓴᓄᑦ ᑐᓐᖓᕕᓕᐊᒍᔪᑦ.

ᐃᓕᑕᕆᓗᒍ ᐱᑦᓯᐊᓂᖓ ᑲᑐᑦᔮᕆᑦᓱᒍ ᐃᓄᐃᑦ ᑮᓇᐅᔭᓕᐅᕋᓱᐊᕐᓂᖏᑦ

ᑲᑎᒪᔪᑦ ᓵᓚᓐᓃᒍᑏᓐᓂᒃ ᑐᓂᔨᑦᓱᑎᒃ ᒪᕐᕉᓂᒃ ᖃᓪᓗᑎᐊᓘᓐᓂᒃ ᐊᕐᕌᒍᑕᒫᑦ ᐱᓲᓐᓂᒃ ᑯᐊᐸᒧᑦ ᐱᐅᓂᕐᐹᓄᑦ ᑮᓇᐅᔭᑎᒍᑦ ᖃᐅᔨᒪᐅᑎᒋᑦᓱᒋᑦ.  ᐅᓇ ᐲᑕ ᒨᑖᒃ ᖃᓪᓗᑎᐊᓗᖓ ᐱᓂᐊᑦᓯᐊᓂᕐᐹᒧᑦ ᑯᐊᐸᒧᑦ ᖃᓪᓗᑎᐊᓗᒃ 2019ᒥ ᑐᓂᔭᐅᓚᐅᕐᓱᓂ ᑲᖏᕐᓱᐊᓗᑦᔪᐊᑉ ᑯᐊᐸᖓᓄᑦ.  ᐋᖅᕿᒋᐊᕐᓯᒪᓂᕐᐹᒧᑦ ᑯᐊᐸᒧᑦ ᖃᓪᓗᑎᐊᓗᒃ 2019ᒥ ᑐᓂᔭᐅᓚᐅᕐᓱᓂ ᑰᑦᔪᐊᕌᐱᒃ-ᒍᐊᑉᒪᒍᔅᑐᐃ ᑯᐊᐸᖓᓄᑦ.

ᒥᐊᔨ ᔪᐊᓇᓯᒧᓪᓕ, ᑖᒃᑯᐊ ᓇᓗᓀᕐᓯᓃᑦ ᑲᒪᒋᔭᐅᓂᖏᑦ ᐱᓪᓚᕆᐅᕗᑦ.  “ᐃᓪᓕᕆᒐᑦᑎᒍ ᑌᓯᒋᐊᒥᒃ ᓇᓗᓀᕐᓱᒋᑦ ᐱᑦᓯᐊᕈᑏᑦ ᑲᑦᓱᙰᒋᐊᓪᓚᐅᑎᑦᓴᓄᑦ ᑯᐊᐸᓐᓂᖅ ᐱᕈᖁᓪᓗᒍ” ᐃᖅᙯᑎᑕᐅᒋᐊᓪᓚᓱᑕᓗ ᐅᐱᓐᓇᓂᕆᓚᐅᕐᑕᖓᓂᒃ ᐃᓚᒌᓴᕐᑐᓄᑦ ᐃᓚᒌᓴᖅ ᓵᓚᓐᓃᒍᑎᑖᕐᓂᒪᑦ ᑯᐊᐸᓐᓂᓕᕆᔨᓂᑦ ᑲᓇᑕᒥ 2020ᒥ ᐊᖏᓂᕐᐹᖅ ᑯᐊᐸᑦᑐᓂ ᑕᒡᕙᓂ ᐊᕐᕌᒍᕐᒥ, ᑐᓂᔭᐅᓚᐅᕐᒪᑦ ᖃᒻᒥᐅᓚᐅᕐᑐᖅ.

ᓄᖅᖃᕆᐊᕈᑎᖓᓂ, ᑲᑎᒪᔩᑦ ᑲᑎᒪᐅᑎᖃᓚᐅᕐᒥᔪᑦ ᓂᕈᐊᕐᓱᑎᒃ ᑲᔪᓯᒃᑫᔨᓪᓚᕆᓐᓂᒃ ᐃᓱᐊᓂ ᑲᑎᒪᓂᒻᒪᕆᐅᑉ.  ᒥᐊᔨ ᔪᐊᓇᓯ, ᑰᑦᔪᐊᒥᐅᖅ, ᓂᕈᐊᕐᑕᐅᓚᐅᕐᑐᖅ ᐃᓕᒐᓱᐊᕐᑐᑑᒐᒥ ᐊᖓᔪᖅᖄᑉ ᐃᓂᖓᓄᑦ.  ᐊᓯᖏᓪᓗ ᑲᑎᒪᔨᐅᓂᕐᒧᑦ ᓂᕈᐊᕐᓂᑯᑦ ᐃᓕᒐᓱᐊᕐᑐᑑᒐᒥᓪᓘᓃᑦ:  ᓵᓕ ᑕᖅᕿᐊᐱᒃ, ᖁᐊᕐᑕᒥᐅᖅ, ᑐᓪᓕ-ᐊᖓᔪᖅᖄᒧᑦ ᐅᖓᕙᒥᐅᓂ; ᓵᔪᐃᓕ ᐅᐃᑖᓗᒃᑐᖅ, ᐃᓄᒃᔪᐊᒥᐅᖅ, ᑐᓪᓕᖅ-ᐊᖓᔪᖅᖄᒧᑦ ᑕᓯᐅᔭᕐᔪᐊᒥᑦ.  ᑕᒐᓗ ᒪᕐᕈᒋᐊᓪᓛᒃ ᑲᔪᓯᒃᑫᔨᓪᓚᕆᓐᓄᑦ ᐱᔫᒃ ᓯᐊᓯ ᐹᕋᓐ, ᑲᖏᕐᓱᐊᓗᑦᔪᐊᒥᐅᖅ, ᐅᓇᓗ ᒫᑭ ᓴᕕᐊᕐᔪᒃ, ᓴᓪᓗᒥᐅᖅ.

ᐃᓚᒌᓴᖅ ᐱᑦᓱᒍ

ᓇᑉᐸᑕᕕᓂᖅ ᐊᐅᓚᑕᐅᑦᓱᓂᓗ ᓄᓇᕕᒻᒥᐅᓄᑦ, ᑕᓪᓕᒪᐅᔪᕐᑐᓗ ᓯᑕᒪᓪᓗᑦ ᑯᐊᐯᑦ ᓄᓇᕕᒻᒥ ᑲᒪᔪᑦ ᐊᒥᓱᐃᓂᒃ ᐱᒍᑦᔨᐅᑎᓂᒃ ᓄᓇᓕᒻᒧᑦ: ᓂᐅᕕᕐᕕᒃ, ᓯᓂᒃᑕᕕᒃ, ᑕᑯᓐᓇᕈᑎᓄᑦ ᐱᑐᑦᓯᒪᐅᑏᑦ, ᐅᕐᓱᐊᓗᑦᓯᕖᑦ, ᒥᓇᕋᕐᓂᖅ ᐅᕐᓱᐊᓗᒻᒥᒃ, ᐊᓯᖏᓪᓗ

ᓄᐃᑕᕕᓂᖅ 1967ᒥ ᐃᑲᔪᕐᑐᓴᐅᓗᓂ ᓄᓇᕕᒻᒥ ᑯᐊᐸᓄᑦ ᐱᕙᓪᓕᖁᑎᑦᓴᓂᒃ ᐃᓱᐊᖁᑎᓂᒃ ᓱᖅᖁᐃᑐᒃᑯᑦ ᐱᕈᕐᐸᓕᐊᒍᑎᑦᓴᖓᓂᒃ, ᐃᓚᒌᓴᖅ, ᐃᑲᔪᕐᑐᖅ ᑯᐊᐸᓂᒃ ᒪᑯᑎᒎᓈᕐᑐᓂᒃ: ᓂᐅᕕᐊᑦᓴᑖᕐᓂᓂᒃ, ᐃᓕᓐᓂᐊᑎᑦᓯᓂᕐᓂᒃ, ᓯᖁᒥᓯᒪᔪᕐᓂᐊᓂᕐᓂᒃ, ᖃᕆᑕᐅᔭᕈᑎᓂᒃ ᐊᐅᓚᑦᓯᓂᕐᓂᓗ ᐃᑲᔪᕐᑕᐅᕕᓕᒃ.  ᐱᓇᓱᐊᖃᑕᐅᖏᓐᓇᓱᓂᓗ ᐊᑦᔨᒌᓐᖏᑐᓄᑦ ᐃᓄᒡᒍᑎᑦᓴᓕᕆᓂᕐᓂᒃ ᑕᒐ ᓂᐅᕐᕈᓯᕐᓂᓂᒃ ᐃᓄᓕᕐᑕᓂᒃ, ᐆᒻᒪᖁᑎᑦᓴᓕᕆᓂᕐᓂᒃ ᐅᓯᑲᑦᑕᓂᕐᓂᓗ.

ᐃᓚᒌᓴᐅᑉ ᑎᒥᐊᕈᖁᑎᖏᑦ ᐃᓗᓕᓖᑦ ᓄᓇᕕᒻᒥ ᐅᕐᓱᐊᓗᓐᓂᐊᓂᖅ ᑎᒥᓐᖑᑎᓯᒪᔪᖅ, ᓯᕙᕕᐊᒥ ᐅᕐᓱᐊᓗᓐᓂᐊᓂᖅ ᑎᒥᓐᖑᑎᓯᒪᔪᖅ, ᐃᓚᒌᓴᐅᑉ ᓴᓇᔨᖁᑎᖃᕐᓂᖓ ᑎᒥᓐᖑᑎᓯᒪᔪᖅ, ᑕᕐᕋᒧᑦ ᐅᓯᔩᑦ ᑎᒥᓐᖑᑎᓯᒪᔪᖅ, ᐅᓯᑲᑦᑕᑏᑦ ᑲᑎᓐᓂᖅ ᑎᒥᓐᖑᑎᓯᒪᔪᖅ, ᐅᓯᑲᑦᑕᑏᑦ ᐹᑦᓚᔮᑦ ᑎᒥᓐᖑᑎᓯᒪᔪᖅ, ᐃᓚᒌᓴᐅᑉ ᐊᕐᕕᑕᐅᑎᓕᕆᕕᖓ ᑎᒥᓐᖑᑎᓯᒪᔪᖅ, ᐱᖁᑎᕗᑦ ᐊᑦᑕᑐᒉᑦ ᑎᒥᓐᖑᑎᓯᒪᔪᖅ, ᑕᖅᖁᑎ ᐃᑯᒪᐅᑎᓕᕆᓂᖅ ᑎᒥᓐᖑᑎᓯᒪᔪᖅ - ᑌᒪᓗ ᐃᓚᐅᕕᖃᕐᒥᔪᖅ ᐅᕐᓱᐊᓗᓐᓂᐊᓂᕐᒥᒃ ᓇᓯᑭᓄᒃ LP, ᓄᓇᖓᓂ ᓯᕙᕕᐊᓪ ᐊᓪᓚᓂ.

ᑕᑯᒋᐊᕈᒪᔪᓄᑦ ᓄᓇᕕᐅᑉ ᑯᐊᐸᓐᓂᖓᓂᒃ ᑕᒐ:

https://www.facebook.com/455534244475061/videos/2618838078382271/

- 30 -

ᖃᐅᔨᒋᐊᕐᕕᓴᖓ :

Caroline Mailloux
ᑐᓴᕈᑎᓕᕆᕕᐊᓐᓂ ᐃᓄᓕᒫᓄᐊᖓᔪᓄᓪᓗ ᑐᕌᕐᑐᓂᒃ
ᐃᓚᒌᓴᒥ
caroline.mailloux@fcnq.ca
514 457-9371 ext. 436

PDF

	ᐋᖅᕿᒋᐊᕐᓯᒪᓂᕐᐹᒧᑦ ᑯᐊᐸᒧᑦ ᖃᓪᓗᑎᐊᓗᒃ 2019ᒥ ᑐᓂᔭᐅᓚᐅᕐᓱᓂ ᑰᑦᔪᐊᕌᐱᒃ-ᒍᐊᑉᒪᒍᔅᑐᐃ ᑯᐊᐸᖓᓄᑦ.
	ᐅᓇ ᐲᑕ ᒨᑖᒃ ᖃᓪᓗᑎᐊᓗᖓ ᐱᓂᐊᑦᓯᐊᓂᕐᐹᒧᑦ ᑯᐊᐸᒧᑦ ᖃᓪᓗᑎᐊᓗᒃ 2019ᒥ ᑐᓂᔭᐅᓚᐅᕐᓱᓂ ᑲᖏᕐᓱᐊᓗᑦᔪᐊᑉ ᑯᐊᐸᖓᓄᑦ.