ᑕᒡᕙᓂ ᐅᓪᓗᒥ, ᑭᖑᓪᓕᐸᐅᓕᕐᑐᖅ ᐃᓅᔪᕐᑕᕆᔭᐅᔪᓄᑦ ᐊᒥᓲᑦᔭᖏᑦᑐᓄᑦ ᓂᕈᐊᕐᓯᒪᔭᖓᓂᐅᒃ  ᓄᓇᕕᒻᒥᐅᑦ ᑯᐊᐸᓂᒃ ᐱᒋᐊᕐᑎᓯᓯᒪᔪᑦ ᐱᒋᐊᕐᑎᓯᖁᑦᓱᒋᑦ ᐃᓚᒌᓴᕐᒥᓂᒃ ᐃᓅᔪᓐᓀᓚᐅᕐᒪᑦ, ᐱᔭᐅᑦᓱᓂ ᓄᕙᓐᓈᓗᒻᒧᑦ Coronavirusᒧᑦ.  ᑖᓐᓇ ᐅᕆᐊᓪ ᓭᓐᑦ-ᐊᒪᖕ ᐊᐅᓚᔨᔭᐅᒍᑎᖃᕐᓂᐊᑐᖅ ᐱᒍᓐᓇᑐᓪᓚᕆᐅᕕᒋᑦᓱᒍ ᐱᓇᓱᐊᕈᓐᓇᓂᖓᓄᑦ, ᐅᑭᐅᓂᒃ ᐊᒥᓱᑲᓪᓚᓂᒃ ᐱᓇᓱᐊᕐᓱᓂ ᑌᒪᓗ ᓇᒻᒥᓂᕐᒥᓂᒃ ᐱᐅᓯᖃᓐᖑᐊᒥᑦᓱᓂ; ᓱᒐᓗᑦᓱᒍᓗ, ᐅᕆᐊᓪ ᐊᐅᓚᔨᔭᐅᓂᐊᕐᑐᖅ ᐃᑎᔪᒥᒃ ᐆᒻᒪᒥᓂᑦ ᐅᖓᒋᔭᖃᓚᐅᕐᓂᖓ ᐃᓄᓐᓄᑦ ᐱᓇᓱᐊᕈᑦᔭᒥᓄᑦ.

ᐅᕆᐊᓪᓚᖅ ᐅᓇᒻᒥᓇᑦᔭᒐᓂ ᑐᓂᕐᕈᓯᐊᖃᕐᓱᓂ ᐊᓪᓚᑯᕕᓕᕆᓂᕐᒥᒃ, ᐱᑎᑕᐅᓯᒪᔪᖅ ᓇᓗᓀᒃᑯᓯᕐᑕᐅᓂᕐᒥᒃ ᑎᑭᐅᑎᓐᓂᕋᒥᒃ ᖃᐅᔨᒪᐅᑎᑎᒍᑦ ᖁᓪᓕᐸᐅᑦᓱᓂ ᑲᓇᑕᓕᒫᒥ ᑌᑰᓇ 1961 ᐃᓕᑕᕆᔭᐅᒍᑎᑖᕈᑎᒋᑦᓱᒍ ᐆᑦᑐᕋᕐᑕᐅᔪᓂ.  ᐅᑭᐅᒃ ᒪᕐᕉᒃ ᖄᖏᕐᑎᓗᒋᒃ ᐱᓇᓱᐊᓯᓐᓂᖁᖅ Caisses Populaires Desjardins ᑮᓇᐅᔭᒃᑯᕕᒻᒥ ᑎᒃᑯᐊᑕᐅᕕᒋᑦᓱᒍ ᑖᒃᑯᓄᖓ ᑕᒻᒪᓯᒪᔪᕐᓯᐅᑎᐅᓂᕐᒥᒃ ᐊᒻᒪᓗ ᐃᒫᙰᕐᑎᐅᓂᕐᒥᒃ ᑖᒃᑯᓄᖓ Desjardinsᑯᑦ ᓯᓚᑖᓃᑦᑐᓂ ‘ᑯᐯᒃ ᑕᕐᕋᖓᓄᑦ’.  ᑕᒪᓐᓇ ᐊᖅᖁᓯᕈᑎᒋᓕᕐᓱᒍ ᐱᒋᐊᕐᓂᖓᓄᑦ ᐊᑯᓂᓐᖑᓱᒍ ᐃᓅᓯᕐᒥᓂ ᑐᓂᒪᓂᐊᓕᕐᓱᓂ ᐃᓄᓐᓄᑦ ᐱᒐᓱᐊᕈᑎᑦᓴᖏᓐᓂᒃ ᓴᓇᕐᕈᑎᓂᒃ ᐊᒻᒪᓗ ᖃᐅᔨᒪᔭᒥᒍᑦ ᐱᓪᓗᕆᒍᑎᑦᓴᖏᓐᓂᒃ ᐃᒻᒥᓅᕈᓐᓇᓂᐊᕐᒪᑕ.

1965ᒍᓕᕐᑎᓗᒍ, ᑲᑎᓯᓕᓚᐅᕐᑐᕕᓂᐅᑦᓱᓂ ᐅᒥᑲᓪᓚᒥᒃ, ᐲᑕ ᒨᑖᒥᒃ ᐊᒻᒪᓗ ᓄᓇᒥᓃᑦᑐᓂᒃ ᓴᓇᐅᒐᕐᑎᓂᒃ ᐳᕕᕐᓂᑐᒥᐅᓂᒃ, ᐅᕆᐊᓪᓚᖅ ᑌᑰᓇ ᒫᓐᓇᓯᐅᑎᐅᓗᓂ ᑕᒻᒪᓯᒪᔪᕐᓯᐅᑎᓐᖑᓂᖅᖁᖅ ᑯᐊᐸᓄᑦ ᐊᒻᒪᓗ ᐃᓕᓐᓂᐊᑎᑦᓯᒍᑎᒋᑦᓱᓂᐅᒃ ᐊᐅᓚᑦᓯᔨᓂᒃ ᖃᓄᐃᓕᐅᕆᐊᖃᕐᓂᖏᓐᓂᒃ ᑲᒪᒋᒋᐊᓕᖏᓐᓄᑦ.  ᐅᑭᐅᒃ ᒪᕐᕉᒃ ᖄᖏᕐᒪᓃᒃ, ᑕᓪᓕᒪᐅᑦᓱᑎᒃ ᐱᒋᐊᕐᐸᓕᐊᔪᑦ ᑯᐊᐯᑦ ᐱᑑᑎᑦᓱᑎᒃ ᓄᐃᑦᓯᓂᐊᕋᒥᒃ ᐃᓚᒌᓴᕐᕕᒋᓂᐊᕐᑕᒥᓂᒃ ᐊᒻᒪᓗ ᑭᖑᓂᐊᐱᐊᒍᑦ ᐊᓯᖏᑦ ᐃᓚᖏᐅᑎᓕᕐᒥᑎᓪᓗᒋᑦ.  ᕿᑐᕐᖓᖏᑦ ᒥᑭᔪᕐᓚᐅᑎᓪᓗᒋᑦ Lévisᒥᐅᒍᓐᓂᒪᑕ, ᐅᕆᐊᓪᓚᖅ ᐊᑯᓂᓐᖑᓱᒍ ᑕᕐᕋᒦᑐᐃᓐᓇᖃᑦᑕᓯᒪᕗᖅ ᐱᓇᓱᐊᕐᓱᓂ ᑮᓇᐅᔦᑦ ᐊᕐᕌᒍᑕᒫᕐᓯᐅᑎᖏᓐᓂᒃ ᑲᒪᑦᓱᓂ, ᑲᑎᒪᔪᓃᑉᐸᓱᓂ, ᓂᐅᕕᐊᑦᓴᓂᒃ ᑭᑎᑦᓯᖃᑕᐅᑦᓱᓂ, ᖃᓄᑐᐃᓐᓇᓕᒫᑦᓯᐊᖅ ᐱᓇᓱᐊᕐᓱᓂ ᐊᔪᐃᓐᓇᐅᑎᒋᔭᐅᓲᓂᒃ ᐱᒋᐊᕐᐸᓕᐊᒐᓱᐊᓕᕐᑐᓄᑦ.  ᑕᒪᓐᓇᐅᒐᓗᐊᕐᑎᓗᒍ, ᐅᕆᐊᓪᓚᖅ ᓇᒻᒥᓂᕐᒥᓄᑦ ᐱᔭᕋᓕᓚᕿᐅᑎᒋᓯᒪᑦᔭᖏᑦᑕᖓ; ᐃᓚᓕᐅᓪᓚᕆᑦᓱᓂ ᐃᓄᓐᓂᒃ ᐊᒻᒪᓗ ᐱᐅᓯᖏᓐᓂᒃ ᑕᒪᓐᓇᓗ ᐃᓕᖓᑦᓯᐊᑐᐃᓐᓇᒥᑦᓱᓂ ᐱᐅᓯᒃᑯᑦ ᑯᐊᐸᓐᓂᒧᑦ ᐃᓕᓐᓂᐅᑎᑦᓴᓯᐊᒧᑦ ᐅᒃᐱᕆᒐᒥᐅᒃ ᐅᕆᐊᓪᓚᖅ ᐅᖓᒋᒐᒥᐅᒃ ᑕᕐᕋᒦᒋᐊᒥᒃ ᐃᓚᒥᓂᒃ ᐃᓚᖃᕐᓱᓂ ᐊᐅᔭᕐᓯᐅᖃᑎᒋᖃᑦᑕᓯᒪᔭᖏᑦ ᑖᕙᓂ ᖃᐅᔨᓂᐊᕐᒥᒪᑕ ᑕᑯᒥᓇᕐᓂᖓᓂᒃ ᓄᓇᐅᑉ ᐃᓄᖏᑦᑕᓗ.  ᐅᑭᐅᖏᑦ 1980ᑦ ᐱᒋᐊᕋᑖᕐᑎᓗᒋᑦ, ᐅᕆᐊᓪᓚᖅ ᐱᓇᓱᐊᖃᑎᖃᕐᓯᒪᔪᖅ ᐃᕐᓂᒥᓂᒃ ᐄᕆᒃ-ᒥᒃ ᐋᖅᖀᓱᑎᒃ ᖃᕆᑕᐅᔭᒃᑰᑐᒥᒃ ᐊᓪᓚᑯᕕᓕᕆᐅᓯᕐᒥᒃ ᑯᐊᐸᓄᑦ ‘’ᕿᒪᑯᖃᐅᑎᒥᒃ ᐊᒧᓯᒍᑎᒥᓪᓗ’’ ᐋᖅᕿᓱᕐᓱᒍ ᐃᓱᐊᕐᓂᖓᓄᑦ ᑌᒪᓗ ᓴᓇᕐᕈᑎᐅᓂᐊᕐᑐᒥᒃ ᐃᓕᓐᓂᐊᕈᑎᑦᓴᐅᓗᓂ.  ᐅᕆᐊᓪᓚᐅᓗ ᐃᕆᒃᓗ ᐋᖅᕿᓱᕐᓯᒪᔭᖓ ᑕᒐ ᑖᓐᓇᐅᓚᐅᖅᖁᖅ ᐊᑐᕐᑕᐅᓚᕆᑦᑐᐊᓘᑦᓱᓂ ᐊᓪᓚᑯᕕᓕᕆᐅᑎᓄᑦ ᐱᓇᓲᑎᐅᑦᓱᓂ ᑎᑭᑦᓱᒍ 2002.

ᑕᒐᓗ ᐅᕆᐊᓪᓚᖅ ᐱᓯᒪᒍᓐᓇᓂᕐᒪᑦ ᐊᐅᓚᑦᔭᑕᐅᑲᓪᓚᐅᒍᑎᒋᑦᔭᓇᒋᑦ ᐱᔭᕐᓃᑐᒃᑰᓇᕐᑐᐃᑦ, ᐃᒫᒃ ᑯᐊᐸᒥᒃ ᐃᑯᐊᓪᓚᑐᖃᕐᑎᓗᒍ ᓄᖑᑦᓱᓂ ᐊᒻᒪᓘᓐᓃᑦ ᓯᑑᓐᓂᖃᕐᑐᐊᓘᑎᓪᓗᒍ ᓄᓇᓕᒻᒥᒃ ᓱᕐᕃᒪᕆᑦᑐᐊᓗᒻᒥᒃ, ᐊᐅᓚᔨᔭᐅᒍᑎᖃᓗᐊᓐᖑᐊᓂᐊᕐᑐᖅ ᑐᓐᖓᓇᕐᓂᖓ ᐃᓅᑦᓱᓂ ᐃᓄᖅᕿᑑᑦᓱᓂ ᐊᓕᐊᓇᕐᓱᓂ ᐊᓕᐊᓀᑦᑑᓱᓂ,  ᐱᓇᓱᐊᕐᓇᓂ ᓯᓂᕐᓱᓕᕋᒥ, ᐅᕆᐊᓪᓚᖅ ᓂᓪᓕᐅᑎᔭᐅᖃᑦᑕᓯᒪᔪᖅ ᑐᓐᖓᓱᑦᑎᓱᒍ “ᐊᑖᑕᑦᓯᐊᙰ”-ᕐᑕᐅᓱᓂ (ᐊᑖᑕᑦᓯᐊᙰ) ᓄᓇᓄᑦ ᑎᑭᑕᒥᓄ ᐃᓕᑕᕐᓯᒪᔪᓄᑦ ᐃᓅᖃᑕᐅᑦᓯᐊᑐᐃᓐᓇᓯᒪᓂᖓᓂᒃ ᐃᓄᓐᓄᑦ ᐊᒻᒪᓗ ᐅᐱᒋᔭᐅᒐᒥ ᐱᓇᓱᐊᕐᓱᓂ ᑐᓂᒪᓂᖓᓂᒃ ᐃᓄᓐᓄᑦ ᐊᒻᒪᓗ ᑯᐊᐸᑦᑐᓄᑦ.

ᐃᓚᒌᓴᖅ ᓇᑯᕐᒦᒍᑎᑦᓴᖃᓪᓚᕆᑦᑐᖅ ᐅᖃᕐᓗᒍ ᓇᓚᐅᒍᓐᓇᖏᑦᑐᒥᒃ ᑖᑦᓱᒧᖓ ᐅᕆᐊᓪᓚᒧᑦ ᐃᓕᓐᓂᐊᑎᑦᓯᓯᒪᒻᒪᑦ ᐊᒥᓱᓂ ᐱᓇᓱᑦᑎᓂᒃ ᑖᒃᑯᐊᓗ ᓱᓕ ᐱᓇᓱᐊᕐᓱᑎᒃ ᑖᕙᓂ.  ᐱᔭᕇᕐᑐᓕ ᑕᒫᓂ ᓄᓇᒥ ᑭᓯᐊᓂ ᐱᓇᓱᐊᕐᓯᒪᓂᖓ ᓱᓕ ᑕᑯᑦᓴᖅ ᐃᖅᖃᓇᕐᑐᖅ.  ᐲᕐᕙᓓᓯᒪᓚᖓᔭᕗᑦ ᑖᓐᓇ ᐱᒻᒪᕆᐅᑎᓐᖏᓂᖓ ᐱᕐᔪᐊᒍᑦᓱᓂ ᓇᑯᕐᒦᑕᕗᓪᓗ ᕿᒪᑦᑕᖏᑦ ᐃᓛᐱᖏᑦ ᐊᒥᒐᓐᖏᑐᒥᒃ ᐱᖃᑎᒋᓚᐅᕋᑦᑎᒋᑦ ᑖᑦᓱᒥᖓ ᐃᓅᖃᑎᖃᕐᑎᓗᒍ ᐃᓘᓐᓇᑎᓐᓂᒃ.

- 30 -

ᑐᑭᓯᒋᐊᕐᕕᓴᖅ :
ᖃᕈᓕᓐ ᒣᐆ
ᑐᓴᕐᑎᓯᒍᑎᓕᕆᔨ ᐃᓄᓕᕆᔨᐅᓪᓚᒥᓗ
ᐃᓚᒌᓴ – FCNQ
caroline.mailloux@fcnq.ca
514 457-9371 ext. 436

PDF