ᐊᓕᕙ ᑐᓗᒐᖅ, ᐊᖓᔪᒃᖄᖓᑦ ᐃᓚᒌᓴᐅᑉ ᑲᑎᒪᔨᖏᑕ, ᑯᐊᐸᓕᕆᖃᑕᐅᔪᖅ ᓄᓇᒥᓂ, ᐳᕕᕐᓂᑑᑉ ᑯᐊᐸᖓᓂ ᑲᑐᑦᔨᔪᓂ, ᐅᑭᐅᖃᓕᕐᓂᕋᒥᓂᑦ 19ᓂᒃ. ᑲᒪᖃᑕᐅᔪᕐᓗ ᐃᓚᒌᓴᕐᒥᒃ 1978ᒥᓂᑦ, ᑖᒃᑯᓇᓂᓗ ᐅᑭᐅᕐᑐᓱᓂ ᓯᑕᒪᓂᒃ ᐊᖓᔪᒃᖃᐅᕕᒋᑦᓱᒍ, ᐃᓱᒪᒋᓂᕐᐹᖓᓗ ᑐᕌᕈᒪᑦᓱᒍ ᑯᐊᐸᒍᓯᖅ ᐱᒍᑦᔨᖏᓐᓇᖁᑦᓱᒍ ᐃᓄᖁᑎᒥᓂᒃ ᑯᐊᐸᑦᑐᓂᒃ ᓱᓕᓗ ᐊᑕᖏᕐᓗᒋᑦ ᓄᓇᕕᒻᒥᐅᑦ.  ᑐᓂᓯᒪᓂᖓ ᐃᑲᔪᕐᓯᒪᓪᓚᕆᑐᐊᓘᕗᖅ ᐱᕙᓪᓕᐊᔭᐅᓕᕐᑎᓗᒍ ᑯᐊᐸᓐᓂᖅ ᓄᓇᕕᒻᒥ.

ᕆᓈᓪ ᓚᐱᐊᕐ, ᑲᒪᔨᐅᕗᖅ ᐴᒃᙯᕕᖓᓂ ᑎᑭᓵᓂᓪᓗ ᐊᐅᓪᓚᑐᑦᓴᓂᓪᓗ, ᐱᓇᓱᐊᕐᓱᓂᓗ ᐃᓚᒌᓴᕐᒥ ᑯᐊᐸᑦᑐᓂᓪᓗ ᐱᒍᑦᔨᔪᖅ ᐅᑭᐅᓂ 43 ᒍᓕᕐᑐᓂ ᑕᒐᑕᒐ.  ᐱᒋᐊᕐᑐᕕᓂᐅᕗᖅ ᑲᒪᔨᐅᑦᓱᓂ ᐃᓄᓕᕐᑕᓂᒃ ᓴᓇᐅᒐᕐᓂᐊᑎᐅᑦᓱᓂ, ᖃᐅᔨᒪᑦᓯᐊᓂᖓ ᐊᑐᕐᓇᑐᕈᑦᓴᐅᑎᒋᑦᓱᓂ.  ᑖᒃᑯᓇᓂ ᐅᑭᐅᓂ, ᑐᓱᓐᓇᓯᓯᒪᔪᖅ ᓴᐱᓕᓱᐃᑦᑑᓂᖓ, ᖃᐅᔨᒪᓂᖓᓗ ᑲᔪᓯᓂᖓᓗ; ᐃᑲᔪᕐᓯᒪᑦᓱᓂᓗ ᖃᓄᐃᓕᐅᕈᓯᕐᓂᒃ ᐱᐊᓚᔪᒃᑯᑦ ᐱᒍᓐᓇᓯᔭᐅᑦᓯᐊᖃᑦᑕᖁᑦᓱᒋᑦ ᓂᐅᕕᐊᑦᓭᑦ ᓄᓇᕕᓕᐊᕐᑐᑦ

ᐊᑦᓱᐊᓗᒃ ᐅᐱᒍᓲᑎᖃᕐᐳᒍᑦ ᐊᓕᕙ ᑐᓗᒐᕐᒥᒃ ᕆᓈᓪ ᓚᐱᐊᕐᒥᓗ!