ᑲᑎᒪᓂᕐᒥ ᑐᓴᕐᑎᑕᐅᖃᑦᑕᓚᐅᕐᑐᑦ ᑐᓴᕐᑎᓯᐅᑎᓕᐊᕕᓂᖏᓐᓂᒃ ᐃᓚᒌᓴᐅᑉ ᐊᓪᓚᕕᓗᑳᖏᑦᑕ, ᐊᕕᑦᑐᓯᒪᔨᐊᖏᑦᑕ, ᑎᒥᐊᕈᖁᑎᓗᑳᖏᑦᑕᓗ, ᕿᒥᕐᕈᒥᑦᓱᑎᓪᓗ ᐃᓄᒡᒍᑎᓴᓕᐅᕐᓂᒨᓕᖓᔪᓂᒃ ᐱᓇᓱᐊᕐᑕᐅᔪᓂᒃ ᑕᕐᕿᑐᕐᑐᕕᓂᕐᓂᒃ ᐱᖓᓲᔪᕐᑐᓂᒃ ᐃᓚᒌᓴᐅᑉ ᐊᕐᕌᒍᖁᑎᖓᑕ ᐃᓗᐊᓂ. ᑐᓴᕐᑎᓯᐅᑎᓂᓗ ᑯᐊᐸᓕᒫᑦ ᐊᕐᕌᒍᑕᒫᕐᓯᐅᑎᖏᑦᑕ ᑖᒃᑯᐊᓗ ᐱᕈᕐᐸᓕᐊᔪᕕᓂᒻᒪᕆᐅᓚᐅᕐᒥᔪᑦ ᑯᐊᐯᑦ ᐊᕐᕌᒍᖁᑎᒥᑕ ᓇᑉᐸᑐᐃᓐᓇᖓᓂ, ᐊᒥᓲᓂᕐᓭᑦ ᐊᓪᓛᑦ ᓂᕆᐅᒋᔭᐅᔪᕕᓂᕐᓂᑦ ᑐᕌᒐᕐᒥᓂ ᐅᖓᑖᓅᕐᓯᒪᖃᑦᑕᓱᑎᒃ.

ᐊᖓᔪᕐᖄᖓ ᐃᓚᒌᓴᐅᑉ ᐋᓕᕙ ᑐᓗᒐᖅ ᐅᖃᕐᑐᖅ, "ᐅᐱᒍᓱᑉᐳᖓ ᑯᐊᐯᑦ ᐱᑦᓯᐊᑐᒻᒪᕆᐊᓘᕙᓗᒻᒪᑕ. ᐱᓗᐊᕐᑐᒥᒃ, ᐃᓄᒃᔪᐊᑉ ᑯᐊᐸᖓ ᐅᐱᒪᒋᐊᖃᕐᑐᓴᐅᓕᕐᑐᖅ - ᑌᒪᖕᖓᓂᐊᓗᒃ ᐃᓚᒌᓴᖃᑕᐅᒋᐊᓯᓚᐅᕐᓯᒪᒐᒥ - ᐅᓄᕐᓂᐹᑦᓯᐊᓂᒃ ᐲᔦᕕᐅᒌᕐᓯᒪᓕᕐᓱᑎᒃ ᖄᖏᕐᓂᑯᓕᐅᕐᓂᐸᐅᕋᑕᕋᒥ ᑯᐊᐸᓕᒫᓂᑦ. ᐱᓇᓱᐊᕆᐊᖃᓚᖓᔪᒻᒪᕆᐊᓘᓚᖓᓕᕋᑦᑕ ᓯᕗᓂᕐᒥ ᐱᐅᔪᒻᒪᕆᐅᓕᕐᖁᓗ ᑯᐊᐯᑦ ᑲᑎᒪᔨᖏᑦ ᑲᑎᖃᑦᑕᓗᑎᒃ ᐊᕐᕌᒍᖁᑎᖓᑕ ᐃᓗᐊᒍᑦ ᑕᕐᕿᑐᕐᑐᕕᓂᕐᓂᒃ ᐱᖓᓲᔪᕐᑐᓂᒃ ᓯᕗᓪᓕᐹᓂᒃ ᕿᒥᕐᕈᖃᑎᒌᓐᓂᖏᑦ ᑐᑭᓯᓴᖃᑎᒌᓪᓗᑎᒃ ᓯᕗᓂᕐᒥ ᐱᓇᓱᐊᕐᐸᓂᐊᕐᑕᒥᓂᒃ ᐃᓱᒫᓘᑕᐅᔪᓂᓗ ᐅᖃᖃᑎᒌᒍᑎᖃᕐᓗᑎᒃ ᐊᕐᖁᑎᖃᕐᓗᑎᒃ ᑯᐊᐯᑦ ᐱᓇᓱᐊᕐᑕᖏᓐᓂᒃ. ᑌᒣᒻᒪᓗ ᑲᑎᖃᑎᒌᓚᕿᓲᖑᔪᒍᑦ, ᑭᒡᒐᑐᕐᓱᖏᑦ ᑯᐊᐯᑦ ᓄᓇᕕᒻᒦᑐᑦ."

ᐊᒻᒪᓗᑦᑕᐅᖅ, ᑲᑎᒪᔩᑦ ᕿᒥᕐᕈᓚᐅᕐᒥᔪᑦ ᓇᓪᓕᑳᕐᓱᑎᓪᓗ ᓴᓇᐅᒐᕐᑕᐅᔪᕕᓂᕐᓂᒃ 2015-ᒥ ᐱᓕᐅᑦᔨᓂᖃᕐᑎᓯᓂᕕᓂᖓᓂᒃ ᐃᓚᒌᓴᐅᑉ ᓴᓇᐅᒐᕐᓂᐊᕕᖓᑕ. ᓴᓇᖕᖑᐊᑕᐅᒋᐊᖃᖃᑦᑕᓚᐅᕐᑐᑦ ᐅᑭᐅᕐᑕᑐᒥᑦ ᑕᑯᔭᐅᓲᑦ ᐆᒪᔪᖕᖑᐊᖑᓗᑎᒃ, ᐃᓱᒪᑖᕈᑕᐅᓐᓂᒪᑕ ᐊᑦᔨᒌᖕᖏᑐᒻᒪᕆᐊᓗᓐᓂᒃ ᐆᒪᔪᕐᑕᖃᓲᖑᒻᒪᑦ ᓄᓇᕕᒻᒥ ᐊᒻᒪᓗ ᐅᓂᒃᑳᑕᐅᕙᑦᑐᑦ ᒪᙯᑦᑐᕕᓂᕐᓄᑦ ᒪᓕᑦᓱᒋᑦ ᐃᓄᐃᑦ ᐱᕐᕈᓯᑐᖃᑦᓴᔭᖓᑎᒍᑦ. ᑲᑎᑦᓱᑎᒃ 34-ᖑᓚᐅᕐᑐᑦ ᐱᓕᐅᑦᔨᔪᕕᓃᑦ 8-ᓂᑦ ᓄᓇᓕᓐᓂᑦ ᐱᓯᒪᑦᓱᑎᒃ ᐊᒻᒪᓗ ᒪᓐᑐᔨᐊᓪᒥᑦ ᐱᓯᒪᔪᑦ ᓴᓇᐅᒐᖃᑕᐅᔪᕕᓂᐅᒻᒥᔪᑦ, ᐃᓄᒻᒪᕆᓐᓅᓕᖓᔪᓂ ᐊᒻᒪᓗ ᐅᕕᒃᑲᓅᓕᖓᔪᓂ.

ᐃᓄᒻᒪᕆᓐᓅᓕᖓᔪᓂ, ᓯᕗᓪᓕᐸᐅᓚᐅᕐᑐᖅ ᔮᓂ ᐊᕐᐹᖃᑦᑕᖅ ᐊᐅᐸᓗᒻᒥᐅᖅ, ᓵᓚᓐᓃᒍᑎᑖᕐᓱᓂ $2,500-ᓂᒃ ᓴᓇᐅᒐᕐᑕᕕᓂᕐᒥᓄᑦ ᓇᓄᖕᖑᐊᒧᑦ ᑎᕐᓕᐊᓯᔪᖕᖑᐊᒍᑦᓱᓂ ᐁᕕᕐᒥᒃ ᐆᑦᑐᒥᒃ ᐳᑦᑖᒥ. ᑐᖓᓕᒋᒃ ᐊᑦᔨᒌᒥᒃ ᓂᕈᐊᕐᑕᐅᓂᕐᒪᓃᒃ ᐃᓇᖁᓇᕐᑐᐊᓗᕋᑕᖅ ᑎᒻᒥᐊᖑᐊᖅ ᒪᓐᓂᓕᖕᖑᐊᖅ ᓴᓇᔭᕕᓂᖓ ᓕᓯ ᑯᐊᑕᐅᑉ ᑰᑦᔪᐊᒥᐅᑉ ᐊᒻᒪᓗ ᓇᑦᔪᒃ ᐃᓗᕐᓴᐅᓕᓯᒪᔪᓂᒃ ᐊᑦᔨᖑᐊᓕᐅᕐᓯᒪᔪᖅ ᕿᒧᑦᓯᑐᖕᖑᐊᒥᒃ ᕿᒻᒥᖏᑦ ᖃᑯᑎᖏᓪᓗ, ᓴᓇᔭᕕᓂᖓ ᑲᖏᕐᓱᐊᓗᒃᔪᐊᒥᐅᑉ ᓖᕙᓐ ᐃᑦᑑᑉ. ᑖᒃᑯᐊ ᐊᑐᓂᑦ ᓵᓚᖃᐅᑎᑖᓚᐅᕐᑑᒃ $1,000-ᓂᒃ. ᐅᕕᒃᑲᓅᓕᖓᔪᓂ, ᑖᓂᐊᓪ ᐅᓂᖕᓇᖅ ᐊᐅᐸᓗᒻᒥᐅᖅ ᓯᕗᓪᓕᐸᐅᒍᑎᒥᓂᒃ $1,200-ᓂᒃ ᐱᒻᒥᑎᓪᒍ, ᐊᑦᔨᖑᐊᓕᐊᕕᓂᕐᒥᓄᑦ ᓇᓄᖕᖑᐊᒧᑦ, ᑐᖓᓕᖓᓗ $800-ᓂᒃ ᓵᓚᖃᐅᑎᑖᕐᒥᑎᓪᓗᒍ, ᓴᓇᔭᕕᓂᖓ ᑰᑦᔪᐊᒥᐅᑉ ᖄᓇ ᑐᒃᑑᒃ ᐃᒪᕐᒨᓲᓂᒃ ᒥᒍᐊᕆᔪᕕᓂᐅᒐᒥ ᐅᑉᐱᐊᓗᖕᖑᐊᒥᒃ. ᐅᐱᒪᓇᕐᐳᓯ ᑕᒪᑦᓯ ᓵᓚᓐᓃᔪᕕᓂᐅᔪᓯ!

PDF