ᐃᓚᒌᓴᖅ ᑐᓐᖓᓱᒃᑎᓯᕗᖅ ᕿᑦᑌᖓᔮᕈᑎᒋᑦᓱᒍ ᑲᒪᔨᒻᒪᕆᓐᖑᑐᒥᒃ ᓄᑖᒥᒃ, ᑖᑦᓱᒥᖓ ᒫᒃ ᐱᓕᐊᒥᒃ, ᑖᓐᓇ ᑐᓂᓯᒪᕕᓕᒃ ᐱᒍᓐᓇᐅᑎᖃᕐᕕᒋᑦᓱᒍ ᐱᓇᓱᐊᕐᓂᒥᒃ ᐱᕈᕐᐸᓕᐊᔪᒧᑦ ᓄᓇᕕᒻᒥ ᑯᐊᐸᓐᓂᒥᒃ ᐅᑭᐅᑦ ᐊᕙᑎᑲᓵᒍᓕᕐᑐᓂ.

”ᒫᒃ ᐱᓕᐊ ᐊᑕᖏᕐᑐᒥᒃ ᖁᓚᕈᑕᐅᓐᖏᓚᖅ ᑲᑎᒪᔨᓄᑦ.  ᑐᓂᓯᒪᐅᑎᖃᕐᓂᖓ ᑯᐊᐸᖁᑎᑦᑎᓄᑦ ᐃᑦᔭᕋᑦᓴᓯᐊᒍᑦᓱᓂ” ᐅᖃᕐᑐᖅ ᒥᐊᔨ ᔪᐊᓇᓯ, ᐊᖓᔪᖅᖄᖓ ᐃᓚᒌᓴᐅᑉ.  ᐱᓇᓱᐊᕐᑐᑦ ᐃᓚᒌᓴᒥ 2001ᒥᓂᑦ,  ᑖᓐᓇ ᓄᑖᖅ ᑲᒪᔨᒻᒪᕆᓐᖑᑐᖅ ᖃᐅᔨᒻᒫᒍᕗᖅ ᐃᓚᐅᓯᒪᓂᕐᒥᓄᑦ ᑯᐊᐯᑦ ᐊᐅᓚᑦᓯᔨᖏᑦᑕ ᐃᑲᔪᕐᑕᐅᕕᖓᓂ ᐊᓪᓚᑯᕕᓕᕆᐅᑦᔭᐅᕕᐅᑦᓱᓂᓗ ᐱᓇᓱᐊᕐᕕᖓᓂ ᑕᒡᕙᓂᓗ ᐃᑲᔪᕐᑕᐅᕕᒋᔭᖓᑦ ᑯᐊᐯᑦ ᐃᓚᒌᓴᕐᑐᑦ ᐊᐅᓚᑦᓯᔨᖏᑦᑕ ᐱᓇᓱᐊᕐᑕᖏᑦᑕᓗ, ᐃᓘᓐᓈᓂᓗ  ᐅᖑᒪᑦᓱᒍ ᑮᓇᐅᔭᖏᑦᑕ ᑲᒪᒋᔭᐅᑦᓯᐊᕆᐊᖃᕐᓂᖏᑦ. ᒫᒃ ᐱᓕᐊ ᐃᓕᒐᒥ ᐊᓪᓚᑯᕕᓕᕆᓂᕐᒥᒃ ᐊᑕᐅᑦᓯᑰᕐᑎᓯᔨᐅᑦᓱᓂ, ᑭᖑᓂᖓᒍᓪᓗ ᖁᕝᕙᕆᐊᕐᑕᐅᒐᒥ ᐃᒫᙰᕐᑎᖑᕐᓱᓂ, ᑐᖓᓕᐅᓂᕐᒧᑦ ᐊᐅᓚᑦᓯᔨᖓᓄᑦ ᑌᒪᓗ, ᑭᖑᓂᖓᒍᑦ, ᐊᐅᓚᑦᓯᔨᓐᖑᓕᕐᒥᓱᓂ ᑕᒪᑐᒪᓂ ᐱᓇᓱᐊᕐᕕᒥ 2016ᒍᑎᓪᓗᒍ”.

ᐃᒻᒧᐊᒍᑦ ᐱᓪᓚᕆᑦᑕᖑᐊᖏᑦᑕ ᐱᔭᖃᑦᓯᐊᕈᑎᒋᔭᖏᓐᓂ ᒪᓐᓇᐅᕗᖅ ᐊᐅᓚᑦᓯᓂᖅ ᐊᒥᓱᐃᓂᒃ ᐱᓪᓚᕆᐅᑎᓂᒃ ᐱᓇᓱᐊᕐᑕᐅᔪᓂᒃ, ᓱᑲᓯᐅᒥᐅᑎᐅᑎᓪᓗᒍ ᐱᕈᕐᐸᓕᐊᓂᖏᓐᓄᑦ ᐃᓄᐃᑦ ᑯᐊᐸᖏᑦ ᑖᒃᑯᓇᓂ ᐅᑭᐅᒍᑫᓐᓇᑐᓂ ᖄᖏᕐᑐᓂ, ᒪᑯᐊ ᑌᒪ ᑕᒐ ᓄᑕᐅᓪᓕᑐᕐᑕᐅᓂᖏᑦᑕ ᐊᒻᒪᓗ ᓴᓇᔭᐅᓂᖏᑦ ᓇᑉᐸᑕᐅᔪᑦ ᓄᑖᑦ ᓂᐅᕕᕐᕖᑖᑦ ᐊᒻᒪᓗ ᓯᓂᒃᑕᕖᑦ.  “ᐅᐱᒍᓲᑎᒋᕙᕋ ᐃᓚᐅᕕᖃᕐᓯᒪᓂᕋ ᑖᒃᑯᓇᓂ ᐱᓇᓱᐊᖃᑎᒌᓂ”  ᐅᖃᕐᑐᖅ ᒫᒃ ᐱᓕᐊ.

2020ᒥ, ᐱᔭᕐᓃᓇᕐᓱᓂ ᒐᓗᐊᕐᑎᓗᒍᓗ ᑲᔪᓯᑦᓯᐊᓗᑎᒃ ᑲᒪᑎᑕᐅᒍᑏᑦ ᓄᑖᒧᑦ ᐃᓕᔪᒧᑦ ᑲᒪᔨᒻᒪᕆᖃᕐᕕᒥ

ᑖᓐᓇ ᑎᒃᑯᐊᑕᐅᓂᖅ ᑎᑭᒻᒪᑦ ᐊᕐᕌᒎᑉ ᐃᓱᐊᓂᓪᓗᐊᖅ ᐊᐅᓚᑦᔮᕿᓯᒪᓇᕐᑐᑯᑦ ᐱᑎᓪᓗᒍ ᐃᓚᒌᓴᖅ.  ᒫᑦᓯᐅᑎᓪᓗᒍ 2020ᒥ, ᓄᐃᑎᓪᓗᒍ ᓄᕙᓐᓈᓗᒃ COVID-19 ᐊᒻᒪᓗ ᓂᕆᐅᓇᓐᖏᑐᒃᑯᑦ ᓄᖅᖃᑐᖅ ᑲᒪᔨᒻᒪᕆᒃ, ᐃᓕᑦᓱᓂ ᐃᓚᒌᓴᖅ ᓇᓗᓇᕐᑐᒧᑦ, ᒫᒃ ᐱᓕᐊ ᑲᒪᑎᑕᐅᓯᓚᐅᕐᑐᖅ ᑲᒪᔨᒻᒪᕆᐅᕕᒻᒥ ᒫᓐᓇᓯᐅᑎᐅᓗᓂ.

ᑯᒻᒪᒋᓂᕐᐹᕆᓚᐅᕐᑕᖓ ᖃᓄᐃᖁᓇᒋᑦ ᐊᒻᒪᓗ ᑲᑉᐲᑯᑕᖃᑦᓯᐊᓗᑎᒃ ᑖᒃᑯᐊ 1100ᑦ ᐅᓄᕐᓂᖏᑦ ᐱᓇᓱᐊᕐᑐᑦ ᑯᐊᐸᓐᓂᐅᑉ ᐃᓗᐊᓂ, ᑖᒃᑯᓇᓐᖓᓗ 800 ᐅᕗᑦ ᑕᕐᕌᒦᑦᓱᑎᒃ.  ᓯᕗᓪᓕᐅᑎᑦᓯᓱᓂ ᑐᓴᐅᒪᐅᑎᓂᕐᒥᒃ ᐊᔪᐃᓐᓈᖃᕆᐊᒥᒃ ᓲᖑᓂᕐᓴᐅᖁᑦᓱᒍ ᐃᓚᒌᓴᐅᑉ ᓱᖏᐅᑎᒋᐊᕐᓂᖓ, ᐊᐅᓚᑦᔭᕆᐊᕐᓂᒧᑦ ᐊᒻᒪᓗ ᐊᑐᕐᒥᓗᒋᑦ ᐃᓄᓕᒫᓄᐊᖓᔪᓂᒃ ᖃᓄᐃᓐᖏᓯᐊᕐᓂᓕᕆᔩᑦ ᐃᒫᙰᕈᑎᖏᑦ.  ᐃᓱᒪᓇᕐᑐᖁᑕᐅᓂᖓᓄᑦ ᑕᒪᒃᑯᐊ ᐱᒍᑦᔨᐅᑎᖏᑦ ᑯᐊᐯᑦ ᐊᑐᓪᓗᐊᕆᐊᖃᕐᑑᓱᑎᒃ, ᒫᒃ ᐱᓕᐊ ᖁᓚᕐᓇᖏᑦᑐᒧᑦ ᐊᑕᔪᒥᒃ ᓂᐅᕕᐊᑦᓴᖃᑦᓭᓇᖁᑦᓱᒋᑦ ᐊᒻᒪᓗ ᐃᑲᔪᕐᑕᐅᓯᐊᕐᓗᑎᒃ, ᑕᒐᓗ ᐃᑯᓪᓚᑎᒐᓱᐊᕐᒥᓱᒍ ᓱᕐᕃᓯᒪᓂᖓ ᖃᓂᒻᒪᓯᐅᑉ ᓯᐊᒻᒪᓯᒪᔫᑉ ᓯᓚᕐᕈᐊᓕᒫᒧᑦ ᓱᒐᓗᑦᑐᒥᒃ ᐃᓚᒌᓴᐅᑉ ᑎᒥᐊᕈᖁᑎᖏᓐᓂ ᑕᒐ ᐃᓪᓗᓕᐅᕐᓂᖅ ᐊᒻᒪᓗ ᓂᐅᕐᕈᑐᓕᕆᓂᖅ.

ᐱᓂᑭᑦᑐᒥ ᐊᒻᒪᓗ ᑲᒪᒋᑦᓱᒋᑦ ᑭᓐᖒᒪᔭᖏᑦ ᑯᐊᐯᑦ, ᐊᑐᓕᕐᓱᓂ ᓯᕗᓕᕆᐊᕐᓱᒍ ᓯᕗᒧᑦ ᐱᓪᓚᐅᑎᐅᑦᓱᑎᒃ ᐊᓪᓚᖁᑏᑦ ᑕᒐ ᒪᑯᐊ ᑕᖅᖁᑎ, ᐱᓇᓱᐊᕐᑕᐅᔪᖅ ᐃᑯᒪᓕᐅᕐᓂᒧᑦ ᓄᓇᓕᓐᓂ ᑕᕐᕋᒦᑦᑐᑦ, ᐊᒻᒪᓘᓐᓃᑦ ᐊᖏᓕᓯᒪᓕᕐᑐᑦ ᐊᒡᒍᓗᒋᑦ ᖄᖏᕐᓂᑯᐃᑦ ᑯᐊᐸᓄᑦ. 

”ᑖᒃᑯᓇᓂ ᑕᖅᕿᐅᑫᓐᓇᑐᓂ ᖄᖏᕐᑐᓂ ᐱᔭᕐᓃᑐᒻᒪᕆᐅᖃᑦᑕᓚᐅᕐᒪᑦ, ᐊᓂᒎᑎᑎᒍᓐᓇᓚᐅᕐᑕᕗᓪᓗ.  ᐅᓪᓗᒥ, ᐅᖃᕈᓐᓇᑕᕋ ᑕᒪᓐᓇ ᐊᑐᕐᓇᑑᓂᕋᕐᓗᒍ ᐊᑑᑎᑦᓱᒍ ᑲᔪᓯᑎᑦᓯᒋᐊᕐᓂᒧᑦ ᑭᒡᒐᑑᑎᖓᓂᒃ ᐃᓚᒌᓴᐅᑉ” ᐅᖃᕐᑐᖅ ᒫᒃ ᐱᓕᐊ, ᑭᓪᓕᖃᕈᑎᖃᕐᓂᐊᓱᓂᓗ ᖃᒻᒥᑯᑦ ᓱᓇᓗᐊᓐᖑᐊᓂᒃ ᐱᓇᓱᐊᕐᑐᓴᐅᔮᕐᒪᖔᕐᒥ ᐱᕙᓪᓕᖁᑎᑦᓴᐅᓂᐊᕐᑎᓗᒋᑦ ᐃᓄᐃᑦ ᑯᐊᐸᖏᓐᓄᑦ.

ᐃᓚᒌᓴᖅ ᐱᓪᓗᒍ

ᓇᑉᐸᑕᐅᓯᒪᔪᖅ ᐊᐅᓚᑕᐅᑦᓱᓂᓗ ᓄᓇᕕᒻᒥᐅᓄᑦ, ᑕᓪᓕᒪᐅᔪᕐᑐᓗ ᓯᑕᒪᓪᓗᑦ ᑖᒃᑯᐊ ᑯᐊᐯᑦ ᓄᓇᕕᒻᒥ ᐊᒥᓱᐃᓕᕆᔪᑦ ᐱᒍᑦᔨᐅᑎᒋᑦᓱᒋᑦ ᓄᓇᓕᒻᒧᑦ: ᓂᐅᕕᕐᕕᒥᒃ, ᓯᓂᒃᑕᕕᒻᒥᒃ, ᑕᑯᓐᓇᕈᑎᓂᒃ ᐱᑐᑦᓯᒪᐅᑏᑦ, ᐅᕐᓱᐊᓗᓐᓂᐊᓂᖅ, ᒥᓇᕋᕐᓂᖅ ᐅᕐᓱᐊᓗᒻᒥᒃ, ᐊᓯᖏᓐᓂᓗ.

ᓇᑉᐸᑕᐅᔪᕕᓂᖅ 1967ᒥ ᐱᒍᑦᔨᔪᑦᓴᐅᓂᐊᕐᓗᓂ ᓄᓇᕕᒻᒥ ᑯᐊᐸᓐᓂᒥᒃ ᐊᑐᕐᓇᑑᓗᑎᒃ ᐱᓗᒍ ᖁᓚᕐᓇᖏᑦᑐᑯᑦ ᐱᕈᑦᓯᐊᖁᓗᒍ, ᐃᓚᒌᓴᖅ, ᐃᑲᔪᕐᑐᖅ ᑯᐊᐸᓂᒃ ᐃᓚᒌᓴᕐᑐᓂᒃ ᒪᑯᑎᒎᓈᕐᑐᓂᒃ: ᓂᐅᕕᐊᑦᓴᑖᕐᓂᓂᒃ, ᐃᓕᓐᓂᐊᑎᑦᓯᓂᕐᓂᒃ, ᐊᐅᓚᐅᑎᓂᒃ ᓯᖁᒥᓯᒪᔪᕐᓂᐊᓂᕐᒥᒃ, ᖃᕆᑕᐅᔭᖃᕐᓂᒥᒃ ᐱᓇᓲᑎᓂᒃ ᐊᒻᒪᓗ ᐊᐅᓚᑦᓯᔩᑦ ᐃᑲᔪᕐᑕᐅᕕᖓᓐᓂᒃ.  ᐱᓇᓱᐊᖃᑕᐅᒻᒥᓱᓂᓗ ᐊᑦᔨᒌᓐᖏᑐᑎᒍᑦ ᐃᓄᒡᒍᑎᑦᓴᓕᕆᓂᕐᓂ ᑕᒐ ᒪᑯᐊ ᓂᐅᕐᕈᓯᕐᓂᓂᒃ ᐃᓄᓕᕐᑕᓂ ᑕᑯᒥᓇᕐᑐᓕᐊᓂᒃ, ᐃᑯᒪᐅᑎᖃᕐᓂᒥᒃ ᐊᒻᒪᓗ ᐅᓯᑲᑦᑕᑏᑦ.

ᐃᓚᒌᓴᐅᑉ ᑎᒥᐊᕈᖁᑎᖏᓐᓂ ᒪᑯᐊᒍᒋᕗᑦ ᓄᓇᕕᒻᒥ ᐅᕐᓱᐊᓗᓕᕆᓂᖅ ᑎᒥᓐᖑᑎᓯᒪᔪᖅ, ᓯᕙᕕᐊᒥ ᐅᕐᓱᐊᓗᓕᕆᓂᖅ ᑎᒥᓐᖑᑎᓯᒪᔪᖅ, ᐃᓚᒌᓴᐅᑉ ᓴᓇᔨᖁᑎᖃᕐᕕᖓ ᑎᒥᓐᖑᑎᓯᒪᔪᖅ, ᑕᕐᕋᒧᑦ ᐅᓯᔩᑦ ᑎᒥᓐᖑᑎᓯᒪᔪᖅ, ᐅᓯᑲᑦᑕᑏᑦ ᑲᑎᓐᓂᖅ ᑎᒥᓐᖑᑎᓯᒪᔪᖅ, ᐅᓯᑲᑦᑕᑏᑦ ᐹᑦᓚᔮᑦ ᑎᒥᓐᖑᑎᓯᒪᔪᖅ, ᐊᕐᕕᑕᐅᑎᓕᕆᕕᖓ ᐃᓚᒌᓴᐅᑉ ᑎᒥᓐᖑᑎᓯᒪᔪᖅ, ᐱᖁᑎᕗᑦ ᐊᑦᑕᑐᐊᒉᑦ ᑎᒥᓐᖑᑎᓯᒪᔪᖅ, ᑕᖅᖁᑎ ᐃᑯᒪᐅᑎᓕᐅᕐᓂᖅ ᑎᒥᓐᖑᑎᓯᒪᔪᖅ - ᑌᒪᓗ ᐱᓇᓱᐊᖃᑎᖃᕐᒥᔪᖅ ᐅᕐᓱᐊᓗᓕᕆᓂᖅ ᓇᓯᑭᓅᒃ LP, ᓄᓇᖓᓂ ᓯᕙᕕᐊᓪ.

ᑕᑯᒍᒪᔪᓄᑦ ᓄᓇᕕᒻᒥ ᑯᐊᐸᓐᓂᒥᒃ ᑕᒐ:

https://www.facebook.com/455534244475061/videos/2618838078382271/

ᐊᒻᒪᓘᓐᓃᑦ ᑕᑯᒋᐊᕐᕕᓴᖅ ᐅᓂᒃᑳᓯᐅᒐᑦᓴᓂᒃ www.fcnq.ca

- 30 -

ᖃᐅᔨᒋᐊᕐᕕᓴᖅ :

Caroline Mailloux
ᑐᓴᕈᑎᓕᕆᕕᒻᒥ ᐃᓄᓕᒫᓄᐊᖓᔪᓕᕆᕕᒃ
ᐃᓚᒌᓴᖅ
caroline.mailloux@fcnq.ca
514 457-9371 ᐅᐃᒍᖓ 436

PDF