Web Content Display Web Content Display

ᐃᕐᖃᓇᕐᑐᖁᑎᖏᑦ

 
ᓯᕗᓪᓕᐹᑦᓯᐊᖑᑦᓱᓂ ‘ᐃᔅᑭᒨ' ᑯᐊᐸᖓ ᑲᓇᑕᒥ ᓄᐃᑕᐅᒋᐊᖕᖓᓚᐅᕐᓯᒪᕗᖅ ᐃᓄᖏᓐᓄᑦ ᑲᖏᕐᓱᐊᓗᑦᔪᐊᑉ (ᔪᐊᑦᔅ ᕆᕙ) 1959-ᖑᑎᓪᓗᒍ. ᐊᑦᑕᑐᐊᕐᑖᖄᕐᓱᑎᒃ $12,000-ᓂᑦ ᑲᕙᒪᑐᖃᒃᑯᓂᒃ ᐃᖃᓗᓐᓂᐊᕈᑎᓂᒃ ᐱᐅᒡᒍᑎᑦᓴᑖᕈᑎᒋᓂᐊᕐᑕᒥᓂᒃ. ᐊᕐᕌᒎᒃ ᒪᕐᕉᒃ ᐃᓗᐊᓂ, ᑯᐊᐯᑦ ᐃᖏᕐᕋᑎᑕᐅᓕᓚᐅᕐᓯᒪᕗᑦ ᑰᑦᔪᐊᒥ (ᕗᐊᑦ ᓭᒨ), ᑲᖏᕐᓱᖅ (ᐯᓐ, ᐯ), ᐳᕕᕐᓂᑐᖅ (ᐸᕙᖕᓇᑕᒃ), ᑭᓪᓕᓂᖅ ᓄᓇᑦᓯᐊᒦᑦᑐᖅ ᐊᒻᒪᓗ ᑰᑦᔪᐊᕌᐱᒃ (ᑯᔩᑦ ᕗᐃᓪ ᕆᕙ).
 
ᑲᕙᒪᑐᖃᒃᑯᑦ ᑲᑦᓱᙰᓕᓭᓚᐅᕐᓯᒪᕗᑦ ᐃᒫᙰᕈᑎᒋᑦᓱᒍᓗ ᑌᑦᓱᒪᓂ ᐱᒋᐊᓕᕐᑎᓗᒋᑦ ᑯᐊᐸᓕᐅᕋᓱᐊᕐᑐᑦ, ᐅᓂᖔᕐᓂᓴᐅᓚᐅᕐᓯᒪᔪᑦ ᑌᑦᓱᒪᓂ ᑯᐊᐯᑦ ᓴᕐᕿᑎᒍᓐᓇᕋᔭᕐᑕᖏᓐᓂᒃ ᑭᓯᐊᓂᓕ ᒫᓐᓇ ᐃᓘᓐᓈᒎᕐᓂᓴᓂᒃ ᐱᓇᓱᐊᕈᑕᐅᖔᕐᐸᓂᖏᑦ ᓄᐃᑕᑎᑕᐅᓂᕐᓴᐅᕗᑦ ᑯᐊᐯᑦ. ᐱᓗᐊᕐᑐᒥᒃ ᑖᓐᓇ ᐳᕕᕐᓂᑑᑉ ᑯᐊᐸᖓ ᓇᑉᐸᑕᐅᓚᐅᕐᓯᒪᔪᖅ ᐊᔪᐃᓐᓇᓂᑯᖓᓄᑦ ᐅᒥᑲᓪᓚᐅᑉ ᐃᑲᔪᕐᑎᖃᕐᓱᓂ ᑯᐊᐸᑦᑐᓂᒃ ᑯᐯᓕᒫᒥ ᐊᒻᒪᓗ ᑯᐯᒃᑯᑦ ᑲᕙᒪᖓᓂᒃ. 
 

ᑌᑦᓱᒪᓂ ᑕᒪᒃᑯᐊ ᑯᐊᐯᑦ ᐱᖕᖑᑎᑕᐅᕙᓪᓕᐊᓕᕐᑎᓗᒋᑦ, ᑕᕐᕋᒥ ᐃᓄᒡᒍᑎᑦᓴᓕᐅᕋᓱᐊᕐᓂᖅ ᐊᑦᔨᐅᖏᓐᓂᓴᒻᒪᕆᐅᓚᐅᕐᓯᒪᕗᖅ ᐅᓪᓗᒥ ᐱᐅᓯᐅᕙᓕᕐᑐᒥᒃ. ᖃᑦᓴᓐ ᐯ ᑲᒻᐸᓂᒃᑯᑦ ᑮᓇᐅᔭᓕᐅᕋᓱᐊᕐᑎᑐᐊᖑᓚᐅᕐᓯᒪᔪᑦ ᑕᕐᕋᒥᐅᑦ ᓄᓇᓕᖏᓐᓂ ᐃᓄᐃᓪᓗ ᐁᕙᓯᒪᕕᒻᒥᓂ ᓄᓇᖃᓲᖑᒐᒥᒃ ᐃᕐᐸᓯᒪᓗᑳᑦᓱᑎᒃ ᑯᐯᒃ ᓯᑦᔭᖏᓐᓂ. ᓄᓇᓖᑦ ᐃᑭᑦᑐᐊᐲᑦ ᐃᓕᓐᓂᐊᕕᖃᓚᐅᕐᓯᒪᔪᑦ, ᐋᓐᓂᐊᓯᐅᕐᓂᓕᕆᔩᓪᓗ ᓱᓇᒥᑦᑐᓂᒃ ᐱᓇᓱᓐᓂᖃᑦᔭᖏᒃᑲᓗᐊ. ᖃᓪᓗᓈᕐᓂᑌᑦ ᐅᒥᐊᕐᔪᐊᑯᑦ ᑎᑭᑉᐸᓚᐅᕐᑐᖅ ᐊᕐᕌᒍᒥ ᐊᑕᐅᓯᕕᑦᓱᑎᒃ ᓄᓇᓖᑦ ᐊᕐᕌᒍᓕᒫᕐᑐᓂᒃ ᐱᒍᑦᔭᐅᓂᖃᕐᐸᓚᐅᑦᔭᖏᒻᒪᑕ. ᐃᓄᐃᑦ ᓂᕆᒐᑦᓴᖃᓲᖑᕙᓪᓗᐸᓚᐅᕐᑐᑦ ᓂᕿᑐᐃᓐᓇᓂᒃ ᐃᖃᓗᓐᓂᓗ ᐆᒪᔪᕐᑕᒥᓂᒃ ᓄᓇᒥᑦ. 

ᓂᐅᕐᕈᓴᕐᓂᖏᑦ ᓴᓇᐅᒐᕐᓂᒃ, ᒥᕐᓱᒐᕐᓂᒃ, ᒥᕐᖁᓕᓐᓂᒃ ᖁᓂᕈᕐᓂᓗ, ᑮᓇᐅᑦᔭᕈᑕᐅᒐᓛᐱᑉᐸᓚᐅᕐᒥᔫᒐᓗᐊᑦ ᓂᐅᕕᓗᑳᕈᓐᓇᐅᑎᒋᓚᕿᑦᓱᒋᑦ ᖃᓪᓗᓈᕐᓂᑕᕐᓂᒃ ᑭᖒᒪᒋᔭᒥᓂᒃ ᑭᓯᐊᓂᐅᒻᒥᔪᖅ. ᐊᑐᓂᑦ ᑯᐊᐯᑦ ᓇᒻᒥᓂᕐᒥᓂᒃ ᑲᑎᒪᔨᖁᑎᖃᕋᓗᐊᕐᓱᑎᒃ, ᑌᑦᓱᒪᓂ ᑯᐊᐸᓕᐅᕐᐸᓕᐊᑕᕆᐊᖕᖓᓕᕐᓱᑎᒃ ᑐᑭᑖᕈᑦᔭᐅᓂᕐᓴᐅᕙᓪᓕᐊᓚᐅᕐᑐᑦ ᑲᒪᒋᔭᐅᓕᖃᕐᓱᑎᓪᓗ ᐊᐅᓚᑕᐅᒋᐊᓕᓐᓂᒃ ᑲᕙᒣᑦ ᐱᓇᓱᑦᑎᖏᓐᓄᑦ, ᑲᖐᓱᒐᓱᐊᕐᑐᓄᓗ ᓄᓇᓕᒻᒥ ᐊᔪᕿᕐᑐᐃᔨᓄᑦ ᐊᓯᖏᓐᓄᓗ ᖃᓪᓗᓈᓄᑦ ᓄᓇᓕᒻᒥ ᐱᓇᓱᐊᕆᐊᕐᑐᓯᒪᔪᓄᑦ. ᑕᒪᒃᑯᓇᓂ ᐊᕐᕌᒎᕙᑦᑐᓂ ᐅᓪᓗᒥᒧᑦ ᑎᑭᑦᓱᒍ ᐃᓄᐃᑦ ᐊᐅᓚᑦᓯᒋᐅᕐᓴᑎᑕᐅᕙᓪᓕᐊᖃᑦᑕᓯᒪᕗᑦ ᐱᓇᓱᐊᕐᓂᓕᒫᑦᓯᐊᖓᓂᒃ ᑯᐊᐸᒥᑕ. ᑕᒪᓐᓇ ᐊᑑᑎᓯᒪᕗᖅ ᐊᕐᕌᒍᓂ ᐊᒥᓲᖕᖏᑐᐊᐱᓐᓂ ᐃᓄᐃᑦ ᐃᓕᑦᓯᒍᐊᕐᑑᓂᑯᖏᓐᓄᑦ ᐱᓇᓱᐊᖃᑕᐅᔪᑦ ᑕᒪᒃᑯᓂᖓ ᐃᑲᔪᕐᓯᒪᔭᐅᖃᑦᑕᓯᒪᒐᒥᓪᓗ ᑕᒪᒃᑯᑎᒎᓇ ᐱᓇᓱᐊᕐᑕᒥᒍᑦ ᐊᕐᕌᒎᕙᑦᑐᓂ. ᓱᕃᓯᒪᓪᓚᕆᑦᑐᐊᓘᖃᑕᐅᒪᒻᒥᔪᖅ ᐱᕙᓪᓕᐊᑎᑕᐅᓂᖏᓐᓂ ᑯᐊᐸᓐᓃᑦ ᓄᓇᕕᒻᒥ ᐃᓚᒌᓴᖃᕐᑎᑕᐅᓂᕐᒥᓄᑦ. ᑖᓐᓇᓗ ᑎᒥᐅᔪᖅ ᐃᓂᓪᓚᑕᐅᓚᕿᓚᕿᓚᐅᕐᓯᒪᒻᒥᔪᖅ ᕿᓄᒍᑕᐅᓯᒪᓐᓂᐸᒥ ᑯᐊᐸᓄᑦ ᑖᒃᑯᐊ ᑯᐊᐸᒐᓱᐊᕐᑐᑦ ᑕᓪᓕᒣᑐᐃᓐᓇᐅᖏᓐᓈᑎᓪᓗᒋᑦ ᐃᖏᕐᕋᓕᕐᑐᑦ ᓄᓇᕕᒻᒥ.
 
ᐃᓚᒌᓴᖓ ᑯᐊᐯᑦ ᑯᐯᒃ ᑕᕐᕋᖓᓂ ᑎᒥᖕᖑᑎᑕᐅᓚᐅᕐᓯᓚᕗᖅ ᒣ 20, 1967-ᒥ ᐊᒻᒪᓗ ᐱᓇᓱᐊᕈᓰᑦ ᓯᑕᒪᑦ ᑭᖑᓂᑐᐃᓐᓇᖓᒍᑦ ᔫᓂ 15-ᖑᓕᕐᑎᓗᒍ, ᑎᒥᐅᔪᖅ ᑖᓐᓇ ᑲᑎᒪᓂᖃᕐᑎᓯᓕᓚᐅᕐᓯᒪᕗᖅ ᓖᕕ ᑯᐯᒻᒥ. ᑕᒪᓐᓇ ᑲᑎᒪᓂᖅ ᑲᑎᑎᑦᓯᓚᐅᕐᓯᒪᕗᖅ ᐃᓄᓐᓂᒃ ᐊᓪᓚᓂᓗ ᑭᒡᒐᑐᕐᑎᒋᔭᐅᓕᕐᑐᓂᒃ ᑖᒃᑯᓄᖓ ᓄᓇᓕᓐᓄᑦ. ᐱᓇᓱᐊᕈᓰᑦ ᐱᖓᓲᔪᕐᑐᑦ ᐃᓱᐊᓂ ᑐᑭᓯᓴᖃᑎᒌᓐᓂᖓᑕ, ᐱᔭᕇᓕᓚᐅᕐᓯᒪᕗᑦ ᐱᖁᔮᐱᑦᓴᕆᓂᐊᕐᑕᖏᓐᓂᒃ ᐃᓚᒌᓴᐅᑉ ᐊᒻᒪᓗ ᐃᓄᓪᓓᓱᑎᒃ ᑐᕌᒐᓱᐊᕈᒫᕐᓂᐊᓕᕐᑕᖏᓐᓂᒃ ᑕᒪᒃᑯᐊᓗ ᐊᑐᕐᓱᒋᑦ ᑌᒪᖕᖓᓂᑦ ᐃᓚᒌᓴᖅ ᐃᖏᕐᕋᑎᑕᐅᑦᓴᖑᐊᑐᐃᓐᓇᓲᖑᕗᖅ. ᑌᒪᖕᖓᓂᑦ 1967-ᖑᓚᐅᕐᓯᒪᒻᒪᑦ, ᑯᐊᐯᑦ ᓇᑉᐸᐅᖃᕐᑕᐅᕙᓪᓕᐊᐸᑦᑐᑦ ᑕᒪᒃᑯᓇᓂ ᐃᓄᐃᑦ ᓄᓇᓕᓕᒫᖁᑎᖏᓐᓂ ᓄᓇᕕᒻᒦᑐᓕᒫᓂ, ᐊᒻᒪᓗ ᑯᐊᐸᓐᓂᖅ ᐊᐅᓚᑦᓯᓚᕆᑦᑐᑑᓯᒪᕗᖅ ᐃᓄᓐᓂᒃ ᐃᓚᐅᑎᑦᓯᓂᕐᒥᒃ ᐱᕙᓪᓕᐊᑎᑕᐅᒐᓱᐊᖃᑦᑕᓯᒪᔪᓕᒫᓂ.