Qui nous sommes

ᐃᓚᒌᓴᖓ ᑯᐊᐯᑦ ᑯᐯᒃ ᑕᕐᕋᖓᓂ

ᐃᓚᒌᓴᖅ ᓇᒻᒥᓂᕆᔭᐅᕗᖅ ᐃᓚᐅᔪᖁᑎᒥᓄᑦ ᖁᓕᓪᓗ ᓯᑕᒪᓪᓗᓄᑦ ᑯᐊᐸᓄᑦ ᐃᓄᐃᑦ ᓄᓇᓕᖏᓐᓄᑦ ᑕᓯᐅᔭᕐᔪᐊᑉ ᐅᖓᕙᐅᓪᓗ ᓯᑦᒪᖏᓐᓂ ᑯᐯᑉ ᑕᕐᐸᖓᓂ, ᑌᔭᐅᓲᒍᓕᕐᑐᖅ ᓄᓇᕕᒻᒥᒃ ᒫᓐᓇ. ᐃᓚᒌᓴᖅ ᓴᕐᕿᑎᑕᐅᓚᐅᕐᓯᒪᕗᖅ 1967-ᒥ ᓱᑲᑦᑐᒪᕆᐅᑦᓱᑎᒃ ᐱᕈᕐᐸᓕᐊᓕᓚᐅᕐᓯᒪᒻᒪᑕ ᑯᐊᐯᑦ ᐃᓱᕐᕉᑎᓕᐊᕆᔭᐅᑦᓱᓂ ᑖᒃᑯᓄᖓ ᐱᔪᓐᓇᓂᖃᑦᓯᐊᓂᕐᓴᐅᖁᓪᓗᒋᑦ ᑭᒡᒐᑐᕐᓂᖃᑦᓯᐊᓂᕐᓴᐅᖁᓪᓗᒋᓪᓗ ᑕᑯᑎᑦᔪᑎᒋᓚᐅᕐᓯᒪᔭᖏᑦ ᐃᒣᓕᔪᑦ ᓴᕐᕿᑎᑕᐅᑦᓯᐊᖁᓪᓗᒋᑦ -ᐊᑕᐅᑦᓯᑯᑦ- ᐃᓅᖃᑎᒌᑦ ᐱᕙᓪᓕᐊᕋᓱᐊᕐᑐᑦ ᕿᒪᒐᐅᑎᑦᑌᓕᑦᓱᑎᒃ.

ᑐᕌᒐᓱᐊᕙᓪᓗᑕᖓ ᑯᐊᐯᑦ ᑲᑐᑦᔮᕆᓗᒍ ᓄᓇᓕᒻᒥᓂᒃ ᐅᖃᕐᑎᒋᔭᐅᓗᓂ ᑲᖐᒋᒐᓱᐊᓕᕐᑕᓕᒫᖏᓐᓄᑦ. ᑌᒣᒻᒪᑦ ᑕᒐ ᑯᐊᐸᒃ ᓂᐅᕕᕐᕕᒍᓗᑐᐃᓐᓇᐅᔭᖏᑦᑐᖅ, ᑕᑯᑦᓱᒍ ᓄᐃᑕᑎᑦᓯᓯᐊᓕᕐᒪᑦ ᐱᔭᕆᓯᒪᓕᕐᑕᖏᑦ ᐊᑦᔨᒌᖕᖏᑐᓗᑳᓂᒃ ᐱᓇᓱᐊᕐᓂᒥᓂ ᐃᒣᑦᑐᓂᒃ:

  • ᐊᐅᓚᑦᓯᔪᑦ ᓂᐅᕕᕐᕕᒥᒃ ᓂᐅᕕᐊᑦᓴᖃᕐᓱᑎᒃ ᐊᑦᔨᒌᖕᖏᑐᒻᒪᕆᐊᓗᓐᓂᒃ, ᓇᓕᑐᓗᐊᕐᑐᐊᓘᒐᑎᓪᓗ, ᑌᒪᖕᖓᒐᓛᓪᓗ ᐱᐅᓕᔭᕕᓂᖏᓐᓂᒃ ᐃᓄᓐᓄᑦ ᑮᓇᔭᓂᒃ ᐅᑎᕐᑎᓯᕙᑦᓱᑎᒃ ᑳᓯᐅᑎᓪᓗᒋᑦ, ᑐᖕᖓᕕᐅᑎᓪᓗᒋᓪᓘᓃᑦ ᐊᕐᕌᒎᑉ ᐃᓱᐊᓂ.
  • ᑮᓚᐅᔭᒃᑯᕕᓕᕆᓃᑦ, ᐊᓪᓚᓯᒪᔪᕐᓂᐊᓂᖅ, ᐱᑐᑦᓯᒪᐅᑎᓕᕆᓃᑦ ᑏᕖᓄᑦ ᐊᒻᒪᓗ ᖃᕆᑕᐅᔦᑦ ᓇᒧᓕᒫᖅ ᐊᒻᒪᒍᓐᓇᐅᑎᖏᓐᓂᒃ.
  • ᐊᐅᓚᑦᓯᒋᐅᕐᓴᑎᑦᓯᓂᖅ, ᐱᓇᓱᑦᑏᑦ ᐃᓕᓂᐊᑎᑕᐅᓂᖏᑦ ᐊᒻᒪᓗ ᑕᒻᒪᓯᒪᔪᕐᓯᐅᑕᐅᓃᑦ.
  • ᓂᐅᕐᕈᓭᓂᖅ ᐃᓄᐃᑦ ᓴᓇᖕᖑᐊᓯᒪᔭᖏᓐᓂᒃ ᑲᓇᑕᓕᒫᒥ, ᓯᓚᕐᔪᐊᓕᒫᒨᕐᑐᓂᓗ.
  • ᓯᓂᑦᑕᕕᓕᕆᓂᖅ, ᐊᕐᕕᑕᐅᑎᓕᕆᓂᖅ, ᐊᒻᒪᓗ ᒪᙯᕝᕕᓕᕆᓂᖅ ᐃᖃᓗᓐᓂᐊᕕᓕᕆᓂᕐᓗ.
  • ᐅᕐᓱᐊᓗᖃᐅᑎᐊᓗᖁᑎᖃᕐᓂᖅ ᐅᕐᓱᐊᓗᓐᓂᐊᑎᓕᕆᓂᕐᓗ ᐅᕐᓱᐊᓗᓗᑳᓄᑦ ᑭᖕᖒᒪᓇᒻᒪᕆᑦᑐᓄᑦ.
  • ᐃᓪᓗᓂᐅᕐᓂᖅ ᓄᓇᕕᐅᑉ ᐃᓪᓗᖁᑎᓗᑳᖏᓐᓂᒃ, ᐊᓇᕐᕋᓴᓂᒃ, ᐊᓇᕐᕋᓴᓂᒃ, ᐃᓕᓴᕐᕕᓴᓂᒃ, ᑌᒣᑦᑐᓗᑳᓂᒃ.

ᑯᐊᐸᖕᓂᖅ ᒫᓐᓇ ᐊᖏᓂᕐᐸᐅᕗᖅ ᑲᕙᒪᓄᑦ ᐃᑲᔪᕐᓯᒪᔭᐅᒐᓂ ᐱᓇᓱᑦᑎᓯᔨᐅᑦᓱᓂ ᐃᓄᓐᓂᒃ ᑕᒪᑐᒪ ᓄᓇᖁᑎᖓᓂ 400 ᐅᖓᑕᓄᑦ ᐊᑕᔪᓂᒃ ᐊᒻᒪᓗᒋᐊᓪᓚᒃ 140-ᒋᐊᓐᓚᓂᒃ ᐱᓇᓱᐊᑮᓐᓇᓲᕐᑕᓕᒃ ᓇᓪᓚᐅᑎᑐᐊᕐᒪᑦ ᐱᕕᑦᓴᖅ ᓄᓇᕕᒻᒥ ᓱᓕᓗ 160 ᐊᑕᔪᒥᒃ ᐱᓇᓱᐊᕐᑐᑦ ᒪᓐᑐᔨᐊᓚᒥ.

ᑯᐊᐯᑦ ᐊᐅᓚᑦᓯᔨᓖᑦ ᐃᓄᑐᐃᓐᓇᓕᒫᑦᓯᐊᓂᒃ ᐱᓇᓱᑦᑎᖃᕐᓱᑎᒃ ᐊᓪᓚᓂᓪᓗ, ᑌᒣᒻᒪᓗ ᓱᕐᖁᐃᑐᒥᒃ ᖃᐅᔨᒪᓂᕆᓕᕐᑕᒥᒍᑦ ᐊᑑᑎᓯᒪᓕᕐᑕᒥᒍᑦ ᐊᐅᓚᑦᓯᒋᐊᖅ ᐊᑦᔨᒌᖕᖏᑐᓗᑳᑎᒍᑦ ᐱᓇᓱᐊᕐᑕᒥᓂᒃ ᐃᓱᕐᕉᑎᖃᕐᑎᓯᒍᓐᓇᓚᕆᓕᕐᒪᑕ ᓄᓇᓕᒻᒥᓂᒃ.

ᑮᓇᐅᔭᓂᒃ ᐊᐅᓚᑦᓯᓂᖓ ᑯᐊᐸᑦᑐᐃᑦ ᓄᓇᕕᒻᒥ ᐊᕐᕌᒍᑕᒫᑦ ᐱᕈᕐᐸᓕᐊᕙᑦᑐᖅ ᐱᒋᐊᓚᐅᕐᓯᒪᑦᓱᓂ $1.1-ᒥᓕᐅᓂᒃ 1967-ᒥ, ᐅᖓᑖᓅᕐᐸᓕᕐᒪᑕ $231-ᒥᓕᐅᓐ 2013 ᑎᑭᑦᓱᒍ.