Art Nunavik

ᐃᓄᐃᑦ ᓴᓇᔭᕕᓂᖏᓐᓂᒃ ᓂᐅᕐᕈᓭᕕᒃ

ᑖᓐᓇ ᑭᒡᒐᑐᕐᕕᒃ ᑲᒪᒋᔭᖃᓲᖅ ᐱᔪᒪᔭᐅᓕᕐᑎᓯᒐᓱᐊᕐᓂᒥᒃ ᓂᐅᕐᕈᓭᓂᕐᒥᓗ ᐃᓄᐃᑦ ᓴᓇᖕᖑᐊᓯᒪᔭᖏᓐᓂᒃ. ᐱᔪᒪᔭᐅᓕᕐᑎᑕᐅᒐᓱᐊᕐᓂᖏᑦ ᐃᓄᐃᑦ ᓴᓇᖕᖑᐊᓯᒪᔭᖏᑦᑕ ᑐᖕᖓᕕᓪᓚᕆᒋᔭᐅᓂᕐᐸᐅᓯᒪᕗᖅ ᓴᕐᕿᑎᑕᐅᒐᓱᐊᓕᕐᒪᑕ ᑯᐊᐯᑦ ᐃᓚᒌᓴᕐᓗ.

ᐊᓪᓛᑦ, ᑯᐊᐯᑦ ᐱᒋᐊᕐᕕᓕᐅᑎᒋᓂᐊᕐᑕᒥᓂᒃ ᑮᓇᐅᔭᓂᒃ ᕿᓂᕋᓱᐊᓕᕐᑎᓗᒋᑦ ᐱᓇᓲᑎᑦᓴᓂᒃ, ᓴᓇᐅᒐᕐᑎᖏᑦ ᓄᓇᕕᒻᒥᐅᑦ ᑲᑦᓱᙰᑦᑐᒪᕆᐅᑦᓱᑎᒃ ᑐᓂᕐᕈᑌᖃᑦᑕᓯᓚᐅᕐᓯᒪᕗᑦ ᐳᓴᓐᑎᖏᓐᓂᒃ ᓴᓇᐅᒐᕐᒥᑕ ᐊᑭᓕᕕᓂᖓᑕ ᓂᐅᕕᕐᑕᐅᓱᓂ ᑕᕝᕗᖓ ᑲᑎᕐᓱᐃᕕᒻᒧᑦ ᐃᓕᖃᑦᑕᓱᒋᑦ. ᑕᐅᕐᓯᐅᑎᖃᕐᑎᓗᒋᑦ, ᐃᓚᒌᓴ ᓂᐅᕐᕈᓭᒍᑦᔨᔨᐅᓂᐊᓕᕐᑎᓗᒍ ᓂᐅᕕᕐᑕᐅᑎᑕᐅᒐᓱᐊᕐᓂᖏᓐᓂᒃ ᐱᔪᒪᔭᐅᓕᕐᑎᑕᐅᒐᓱᐊᕐᓂᖏᓐᓂᓗ ᓴᓇᐅᒐᕐᑏᑦ, ᐊᑦᔨᖑᐊᓕᐅᕐᑏᓗ.

ᓂᐅᕕᕐᑕᐅᔪᕕᓃᑦ ᐃᓪᓗᓭᑦ ᓂᐅᕕᕐᕕᓕᐊᑦᓭᑦ ᓂᐅᕕᐊᑦᓴᖁᑎᑦᓴᖏᓪᓗ ᓯᕗᓪᓕᐹᑦ ᐱᔭᐅᒍᓐᓇᓯᓚᕿᓚᐅᕐᓯᒪᕗᑦ ᑖᒃᑯᓇᖕᖓᑦ ᑲᑎᕐᓱᑕᐅᔪᕕᓂᕐᓂᑦ ᑮᓇᐅᔭᓂᑦ ᐱᑦᓱᑎᒃ.

ᐅᓪᓗᒥᐅᓕᕐᑐᓕ, ᑮᓇᐅᔭᖁᑎᖏᑦ ᑯᐊᐯᑦ ᐊᑦᑕᓇᓗᐊᓲᖑᒍᓐᓀᒪᑕ ᑮᓇᐅᔭᖃᕐᑎᑕᐅᒋᐊᖃᓲᒍᑦᔭᒍᓐᓀᑐᑦ ᓴᓇᐅᒉᑦ ᓂᐅᕕᕐᑕᐅᓂᖏᓐᓂᑦ ᐱᔪᓂᒃ ᑭᓯᐊᓂᓗ ᐃᓚᒌᓴᖅ ᓱᓕ ᐊᖏᕐᓂᐸᐅᓭᓐᓇᖏᓐᓇᑑᒐᓗᐊᖅ ᓯᒪᕐᔪᐊᓕᒫᒥᓪᓗ ᐃᓕᑕᕆᔭᐅᓕᕐᓱᓂ ᓴᓇᐅᒐᕐᓂᒃ ᓂᐅᕐᕈᓭᔨᐅᓂᖓ ᑯᐯᒃ ᑕᕐᕋᖓᓂᑦ ᐱᓯᒪᔪᓂᒃ.