Comptabilite

ᐊᓪᓚᑯᕕᓕᕆᕕᒃ

ᓱᑯᐃᔦᓂᖅ, ᓱᕐᖁᐃᓯᒐᓱᐊᕐᓂᖅ, ᐊᓪᓚᖁᑎᓕᐅᕐᓂᖅ, ᐊᑭᓕᕐᑐᐃᓂᖅ ᐊᓪᓚᖁᑎᓂᓗ ᐃᓂᖓᓅᕐᙯᓂᖅ ᑕᐅᓴᓐᑎᐅᓈᕐᑎᓱᑎᒃ ᐊᑭᓕᕆᐊᓕᓐᓂᒃ; ᑲᓱᕐᑎᓯᒐᓱᐊᕐᓂᖅ ᐊᓪᓚᑯᕕᓐᓂᒃ; ᐱᕙᓪᓕᐊᑎᑦᓯᓱᑎᓪᓗ ᑕᒻᒪᓯᒪᔪᕐᓯᐅᕋᑦᓭᑦ ᐱᐅᓯᕐᓲᑎᑦᓴᔭᖏᓐᓂᒃ; ᐊᕐᕌᒍᑕᒫᕐᓯᐅᑎᓂᒃ ᑐᓴᕐᑎᓯᐅᑎᓕᐅᕐᓂᖅ... ᑕᒪᒃᑯᐊᓕᒫᑦ ᑕᒐ ᐱᔭᕆᐊᑐᔪᕐᔪᐊᖅ ᐱᔭᒃᓭᑦ ᐱᓇᓱᐊᕐᑕᐅᓲᖑᕗᑦ ᐃᓚᒌᓴᐅᑉ ᐊᓪᓚᑯᕕᓕᕆᕕᖓᑕ ᐊᓪᓚᖓᓄᑦ.

ᑖᒃᑯᐊ ᐊᑐᕐᑐᒪᕆᐊᓗᓐᓂᒃ ᐱᓇᓱᐊᓲᑦ, ᑎᒥᐅᔫᑉ ᑮᓇᐅᔭᖁᑎᖏᑦ ᐊᑦᑕᓈᕿᖁᓇᒋᑦ ᐃᑲᔪᕐᓯᒪᒍᑕᐅᓗᑎᓗ ᑯᐊᐯᑦ ᐅᓇᒻᒥᒋᔭᖏᓐᓂᒃ. ᐅᐱᓐᓇᐸᑦᑐᖅ ᑖᑦᓱᒪ ᐊᓪᓚᕕᐅᑉ ᓇᐅᖁᒪᔨᐅᑦᓯᐊᕋᓱᐊᕐᓂᖓ ᐸᐸᑦᓯᓯᐊᕋᓱᐊᕐᓂᖓᓗ, ᐊᓪᓛᑦ ᐃᓚᒌᓴᒥᒃ ᐃᓕᑕᕆᔭᐅᑦᓯᐊᑎᑦᓯᓯᒪᓕᕋᒥ ᐊᑭᓕᑦᓵᖃᕋᓗᐊᕈᓂ ᐊᑦᑕᓇᕈᓐᓀᓕᕋᔭᕐᓂᖓᓂᒃ ᑌᒣᑦᓱᓂᓗ ᑮᓇᐅᔭᓂᒃ ᐊᑐᕐᑎᑕᐅᑦᑌᓕᕙᒍᓐᓀᑐᖅ ᑮᓇᐅᔭᒃᑯᕕᓐᓂᑦ ᐱᓇᓱᐊᕈᒪᔭᒥᓄᑦ. ᖃᐅᔨᒪᔮᖑᓕᕋᒥᒃ ᐃᓚᒌᓴᖅ ᑯᐊᐸᑦᑐᓕᒫᓪᓗ ᐃᑲᔪᕐᓯᒪᑦᓯᐊᕋᓱᐊᓲᒍᓕᕐᒪᑕ ᐱᓇᓱᐊᕐᑕᐅᒍᒪᓕᕐᑐᓂᒃ, ᑮᓇᐅᔭᒃᑯᕖᑦ ᒥᓐᓂᓭᓐᓇᖑᐊᑐᐃᓐᓇᑑᔮᓲᑦ ᐊᑦᑕᑐᕐᑎᓯᒍᑎᒋᒍᓐᓇᑕᒥᓂᒃ ᓄᓇᓅᓕᖓᔪᒃ ᐅᖓᓯᑦᑐᓴᔭᓄᑦ ᒫᓐᓇ ᖁᓄᓲᖑᒐᓛᒍᓐᓀᒪᑕ ᐊᑦᑕᑐᕐᑎᓯᒋᐊᖅ ᐃᓚᐅᖃᑕᐅᑦᓯᐊᓂᕐᓴᐅᓲᖑᓕᕋᒥᒃ ᐱᓇᓱᐊᕐᑕᐅᒪᕆᒍᒪᔪᓕᒫᓂ.

ᑕᒪᓐᓇ ᐸᐸᑦᓯᓯᐊᕋᓱᐊᓲᖑᓂᖅ ᐃᓱᒫᓘᑎᖃᑦᓭᓇᕋᓱᐊᓲᖑᓂᕐᓗ ᑮᓇᐅᔭᕐᑐᓗᐊᕐᑎᓯᑦᑌᓕᒪᓂᕐᒥᒃ ᐃᓚᒌᓴᒥᒃ ᐊᒥᐊᒃᑯᖃᕐᑎᓯᓂᕐᓴᐅᓲᖑᓕᕐᑐᖅ ᑮᓇᐅᔭᓂᒃ ᐊᕐᕌᒍᓂ ᐊᒥᓲᖕᖏᑐᓂ ᑭᖑᓪᓕᐹᓂ, ᑖᒃᑯᓄᖓᓗ ᑮᓇᐅᔦᑦ 14-ᓄᑦ ᑯᐊᐸᓄᑦ ᐃᓱᕐᕉᑎᑖᕆᔭᐅᓲᖑᓕᕐᖁᑦ ᖄᖏᕐᓂᑯᑦᓴᑖᕆᔭᐅᑎᑦᓱᒋᑦ.