Web Content Display Web Content Display

ᖃᕆᑕᐅᔭᓂᒃ ᐱᓇᓲᑎᓕᕆᕕᒃ

ᖃᕆᑕᐅᔦᑦ ᓄᐃᒋᐊᖕᖓᓚᐅᕐᓯᒪᑎᓪᓗᒋᑦ ᐃᓚᒌᓴᒥ 1980ᑦ ᐃᓱᐊᓂ, 1997-ᐅᓕᕐᒪᑦ ᑭᓯᐊᓂ ᑕᒪᓐᓇ ᖃᕆᑕᐅᔭᑎᒍᑦ ᐱᑐᑦᓯᒪᐅᑎᓂᖅ ᐊᑐᕐᐸᓕᕐᑕᕗᑦ ᐅᓪᓗᒥ ᑲᔪᓯᑎᑕᐅᓯᓚᐅᕐᓯᒪᔪᖅ, ᐊᑐᕐᑕᐅᒋᐊᖕᖓᓯᑎᓪᓗᒋᑦ ᖃᕆᑕᐅᔦᑦ ᐃᓄᓕᕆᐅᑏᑦ ᑯᐊᐸᒥ ᐊᒻᒪᓗ ᐃᑯᒪᐅᑎᒨᕐᑐᑦ ᓂᐅᕕᕐᑎᓯᐅᑏᑦ ᑕᕐᕋᑐᕐᓱᒍ ᐊᑭᖓᓂᒃ ᐊᓪᓚᓲᑦ ᐃᓇᒌᑎᓪᓗᒋᑦ ᑭᑎᑦᔪᑎ ᓇᕐᓂᓱᒍ ᐊᑭᖓᓂᒃ ᐊᓪᓚᓲᓂᒃ ᖃᕆᑕᐅᔭᓂᒃ.

1998-ᒥ ᐃᓚᒌᓴᐅᑉ ᖃᕆᑕᐅᔭᑐᖃᖏᑦ ᐊᓯᑦᔨᑐᕋᕐᑕᐅᓕᓚᐅᔪᒻᒥᔪᑦ ᓄᑖᑦᓴᔭᐅᓂᕐᓴᓂᒃ ᖃᕆᑕᐅᔭᕆᔭᐅᕙᓕᕐᑐᓂᒃ ᐅᓪᓗᒥ.

ᐊᑦᔨᒌᖕᖏᑐᒻᒪᕆᐊᓘᓲᒍᒻᒪᑕ ᐊᑐᓂᑦ ᐊᓪᓚᕖᑦ ᐱᓇᓱᒍᓯᖏᑦ ᓇᒥᓂᖅ ᖃᕆᑕᐅᔭᑎᒍᑦ ᐃᓱᒫᓘᑎᖃᕐᒥᓱᑎᒃ ᐃᓱᒣᓐᓇᖅ ᐱᔭᕆᐊᑐᔫᓱᑦ.

ᖃᕆᑕᐅᔭᓕᕆᔩᑦ ᑌᒪᖕᖓᓕᒫᑦᓯᐊᖅ ᓇᒻᒥᓂᖅ ᐃᓱᒪᒐᓱᐊᓲᑦ ᓴᕐᕿᑎᑦᓯᒐᓱᐊᕐᓱᑎᒃ ᐃᓂᓪᓚᓯᐊᕈᑕᐅᓂᐊᕐᑐᒥᒃ ᐃᓚᖓᓂᓘᓐᓃᑦ ᑐᑭᓯᒪᖕᖏᑕᒥᓂᒃ ᑌᒫᒃ ᐋᕐᕿᒍᑎᑦᓴᖃᑦᔭᖏᒻᒪᑦ ᐊᑐᓂᑦ ᐊᓪᓚᕖᑦ ᓴᕐᕿᑎᑕᖏᓐᓂᒃ.

ᐊᐅᓚᑦᓯᓃᑦ ᓯᓂᑦᑕᕖᑦ ᐱᖁᑎᖏᓐᓂᒃ, ᐊᑭᓕᐅᕆᒍᓯᓕᕆᓃᑦ ᑕᓚᕖᓭᑦ ᐱᑐᑦᓯᒪᐅᑎᖏᓐᓄᑦ, ᓂᕕᐊᑦᓴᑖᕐᓃᑦ, ᐊᒡᒍᑐᐃᒍᓰᑦ, ᓂᐅᕕᕐᑕᐅᔪᕕᓃᑦ ᐊᑭᖏᑦ, ᐊᐅᓚᑦᓯᓃᑦ ᐅᕐᓱᐊᓗᖃᐅᑎᐊᓗᓐᓂᒃ, ᐳᓚᕋᕐᑐᓕᕆᓃᑦ, ᐊᕐᕕᑕᐅᑎᓕᕆᓃᑦ, ᑮᓇᐅᔭᒃᑯᕕᓕᕆᐅᓰᑦ ᐊᒻᒪᓗ ᑮᓇᐅᔦᑦ ᐊᐅᓚᑕᐅᓂᖏᑦ... ᑭᓇᒃᑯᓕᒫᑦᓯᐊᑦ ᑕᒪᒃᑯᓂᖓ ᐱᓇᓱᐊᕐᑐᑦ ᐊᑐᐊᕐᑌᒫᕐᕕᖃᓲᑦ ᐃᑲᔪᕐᑕᐅᓚᖓᓂᕐᒥᓂᒃ ᐱᓇᓱᐊᕐᑕᒥᓂᒃ ᖃᕆᑕᐅᔭᓕᕆᓂᕐᒥᓂ.

ᐅᓪᓗᑕᒫᑦ, ᐅᓪᓗᓕᒫᖅ, ᖃᕆᑕᐅᔭᓕᕆᔩᑦ ᐃᑲᔪᕐᓯᒪᓲᑦ ᖃᕆᑕᐅᔭᓂᒃ 300 ᐅᖓᑖᓅᕐᑐᓂᒃ, 50-ᑲᓵᓃᑦᑐᓂᒃ ᐊᑦᔨᒌᖕᖏᑐᓂ ᓇᔪᕐᑕᖏᓐᓂ.

ᐅᓇᓕ ᐱᒻᒪᕆᐅᓂᕐᓴᐅᓭᓐᓇᐸᑦᑐᖅ ᖃᕆᑕᐅᔭᓂᑦ, ᑖᒃᑯᐊ ᐃᓄᐃᑦ ᖃᓪᓗᓈᓪᓗ ᑖᒃᑯᓂᖓ ᖃᕆᑕᐅᔭᓖᑦ, ᐱᔭᒃᓴᒥᓂᒃᑕᐅᖅ ᐊᖑᒪᑦᓯᒋᐊᖃᕐᓂᖏᑦ, ᑌᑲᓂ ᐱᔭᕇᕐᓯᒪᕕᒋᒋᐊᓕᖓᓂ ᐊᖑᒪᑦᓯᒐᓱᐊᕐᑐᑦ, ᓱᕐᖁᐃᑐᒥᒃ ᐊᖑᒪᑦᓰᓇᕆᐊᓖᑦ ᓂᕿᖃᕐᑎᓯᖏᓐᓇᕋᓱᐊᕐᓗᑎᒃ, ᑕᒪᓐᓇᓗ ᐱᔭᕆᐊᑭᑦᑑᕙᖕᖏᑐᖅ ᑖᒃᑯᓄᖓ ᖃᕆᑕᐅᔭᓕᕆᔨᓄᑦ. ᐱᓇᓱᕝᕕᐅᔪᖅ ᓇᓪᓕᐊᓂᒃ ᑕᑯᕐᖄᓱᒍ ᐃᓂᓪᓚᓯᐊᕐᕕᒋᒐᔭᕐᑕᖓᓄᑦ ᐃᓱᒪᖃᑎᖃᕋᓱᐊᓲᒍᒻᒪᑕ ᐱᓇᓱᐊᕐᑕᐅᔪᑦ ᐃᓱᐃᓪᓕᖓᖁᓇᒋᑦ, ᖃᕆᑕᐅᔭᖃᕐᑎᖏᓐᓇᕋᓱᐊᕐᓱᒋᑦ ᐊᑐᕐᐸᑐᑦ ᑕᒪᒃᑯᓂᖓ ᑭᒡᒐᑐᑦᓯᐊᕈᑎᒋᓂᐊᕐᑕᒥᓄᑦ ᐃᓚᐅᔪᖁᑎᒥᓂᒃ.

Web Content Display Web Content Display